Uyathembisa ulamati osephantsi kweliso loogqirha
ULUDUMO Lamati uqabukile futhi uyakwazi nokutya ngoku, itsho ingxelo entsha ekhutshwe ngabaphathi bakhe.
Okalamati wayokungeniswa esibhedlele ngokukhulu ukungxama ebelfast, eireland, emva kokubethwa kakubi ngunick Ball emlweni obukwiveki engaphaya kwephelileyo.
Bekukhe kwakubi kwiveki ephelileyo noxa ebekwimeko ezinzileyo phantsi kweliso loogqirha. Kuhle kule veki ngoba uqabukile futhi kuyangena ukutya kuye.
Likhona ithemba lokuba uza kukhutshwa kungekudala kwigumbi labantu abakwimeko embi kakhulu esibhedlele. “Intshatsheli yethu iyalulama ngokuya kuhamba iintsuku,” itshilo iboxing 5 Promotions kwikhasi lomnatha.
“Ngoku silinde iinkcukacha ezintsha koogqirha abaza kusichazela ngenkqubela eyenzakayo empilweni yakhe ulamati. Sifuna ukudlulisa amazwi ombulelo kubo bonke abantu abathumele amazwi nemithandazo kulamati,” itshilo ingxelo ekhutshwe yiboxing 5 Promotions.
Uludumo woselwa ngamanqindi kaball emizuzwini yokugqibela emlweni obusebelfast kwiveki engaphaya kwephelileyo. Waye akabikho sezingqondweni okwethutyana, kodwa zathi xibilili izibilini kubathandi bamanqindi emva kweziphumo zovavanyo ezathi akukho ngozi ebonakeleyo kulamati.
Nangona imbethimanqindi yasemdantsane yantingela kwelaseyurophu inethemba lokubuya nempumelelo, kodwa uball wawuphumelela umlo.
Zange afune ke kambe ukuyivuyela impumelelo yakhe ngoba wayexhalatyiswe kakhulu yimeko kalamati.
“Into ebalulekileyo kum ngoku yimpilo kalamati. Ndiyathemba ukuba usaphila. Eyona nto engandivuyisa mna kukumbona ephilile. Abantu balahlekelwa bubomi emanqindini. Yiyo le nto ndisithi yimpilo yakhe into ebalulekileyo,” watsho uball emva komlo.
Emva kokungeniswa kwakhe ulamati esibhedlele, umphathiswa wezemidlalo empuma Koloni wathumela amazwi okumomeleza.
Kukhona ukuxhalaba ngoku ebantwini bamanqindi ngoba umzantsi Afrika ukhe walahlekelwa yimbethimanqindi kunyaka ophelileyo eyonzakala emdlalweni.
Kulindeleke achithe ixesha elide ulamati elaliswe esibhedlele ade aphile ngokupheleleyo ebelfast phambi kokubuyela emzantsi Afrika.