“Ndifuna ukudlalela iqela lesizwe”, utsho ucassius Mailula!
Pedro Mapelo Pedro.mapelo@inl.co.za
BALIQELA abadlali abasakhulayo abazibonakalisileyo kwisizini ephelileyo kodwa oyena othe waqaqamba kubo bonke ibe ngucassius Mailula odlalela imamelodi Sundowns.
Umailula, 21, unikwe ithuba lokudlalela isundowns kwisizini egqithileyo walithi xhakamfu ngezandla zozibini akaphinda wabuya umva kwaphela. Okwenziwa kuye ngumqeqeshi wakhe urulani Mokwena ukubuyekeze ngokufaka amagowuli alishumi elinesihlanu kwisizini yonke. Amagowuli amaninzi awafakileyo umailula abhence isakhono esihle anaso sokudlala ibhola ekhatywayo kwinqanaba eliphezulu kodwa okuye kwamnceda kakhulu kukufukanywa ngoorhasatsha babadlali abasemgangathweni ophezulu abafana nopeter Shalulile, uthemba Zwane noteboho Mokoena.
Yiyo lo nto ucassius Mailula evotelwe njengoyena mdlali osemncinane oye waqaqamba kwisizini egqithileyo. Uncome umqeqeshi wakhe omkhombisa indlela yokwenza izinto nomnike ithuba elinqabileyo kubadlali abaninzi ebholeni ekhatywayo emzantsi Afrika.
“Abaqeqeshi bandithembile. Into endinokuyenza ngoku kukuqhubela phambili nokuphucula indlela endisebenza ngayo ebaleni,” utshilo umailula kulindixesha wesundowns kutshanje.
Umdlali omtsha okanye osakhulayo uyasokola phambi kokufumana ithuba lokudlala kwisundowns ngenxa yomgangatho ophezulu wabadlali enabo. Kuye kunyanzeleke ukuba asebenze ngokuphindeneyo umdlali ofikayo ukuze adlale imidlalo njengabadlali abafana noshalulile ofaka amagowuli.
“Akululanga ukudlalela isundowns. Kunyanzelekile uyiphucule indlela odlala ngayo kwisizini nganye. Ndizimisele ukubeka ingqondo yam kuyo yonke into eyenzekayo kwisizini ezayo ngoba kukho indawo endicinga ukuba ndingenza bhetele kuzo. Isizini ezayo iza kuba nzima kum ngoba abantu baza kulindela lukhulu. Apha kum ikhona into ethi mandingazifaki phantsi koxinizelelo ngoba abaqeqeshi bam ngabona bandincedayo. Kunyanzelekile ndizame ukwenza bhetele kunesizini yam yokuqala ngoba ndifuna ukudlalela iqela lesizwe. Ukuze ndiqatshelwe ngumqeqeshi webafana Bafana, kufuneka ndizimisele kakhulu ukuze ndifumane ithuba lokuqaqambisa isakhono sam sokudlala ibhola ekhatywayo,” utshilo umailula wesundowns ebiziintshatsheli zesizini egqithileyo.