Kusolwa amarabi kolunywe yinja
KUZOBABHEDELA abangafuni ukugoma izinja namakati njengoba uNgqongqoshe wezoLimo uDkt Meshack Radebe eseveze ukuthi bazofuna incwadi yasenkantolo enkulu ebagunyaza ukuthi babulale izinja namakati angenabanikazi nalezo zalabo abangazigomile.
URadebe ubekhuluma ngesikhathi evakashele ingane (4) yaseNgonyameni eduze kwaseMlazi elaliswe esibhedlela eMshiyeni ngoba isolwa ngokuba namarabi emuva kokuvelwa yizimpawu zalesi sifo.
URadebe uthe abantu kumele babone ukuthi amarabi abucayi kangakanani futhi kumele bakhuthazwe ukuthi bagome izinja namakati abo ukuze singabhebhetheki isifo samarabi.
Kuthiwa ekuqaleni konyaka lo mfanyana uvele izimpawu zamarabi nokuholele ekutheni unina amyise esibhedlela.
Unina wengane uthe uqale ukubona ukuthi kukhona okushaya amanzi ngoMeyi lapho ingane yakhe ibingasafuni ukudlala nezinye izingane. Kusukela lapho ibe isihanjelwa ngumqondo. Uthe ubengazitsheli ukuthi ukugula kwakhe ngabe kuhambisana nokulunywa yinja onyaweni.
“Ubekhala athi ubona izilwane, kwesinye isikhathi nami ubengangiboni athi ngiyisilwane,” kusho unina.
UDkt Arkhtar Hussain ongamele izinhlelo zokwelashwa kwezingane eMshiyeni, uthe yize sebemhlolile umntwana imiphumela ayikavezi ukuthi unamarabi kepha izimpawu zakhe zonke zithi unawo.
“Izimpawu azivezayo zithi unamarabi kepha imiphumela yokumhlola ayikuvezi lokhu. Sisazoqhubeka simhlole ukuze sibone ukuthi akukho yini okuvelayo. Okubalulekile okwamanje ukuthi simelaphele lezi zimpawu azikhombisayo,” kusho uHussain.
Uthe isimo sengane sisesibi ngoba namanje isadliswa ngamapayipi kanti ayikakwazi ukuzikhulumela.
Kusukela kuqale ukusabalala kwezigameko zamarabi sekushone abantu abathathu, ingane (8) yaseBergville, owesifazane waseNgonyameni nowesilisa wase-Underberg.
Zingu-45 izinja okutholakale ukuthi zinamarabi kusukela kuqaliwe ukuhlolela lesi sifo kanti inja eyaluma le ngane kutholakale ukuthi inamarabi okukwenza kusolise ukuthi izimpawu ezivela kuye ngezawo.
URadebe uphuthume kwa-A eMlazi lapho bekukhona nowesifazane obekusolwa ukuthi naye ungenwe amarabi.
Uthe sekunethimba elibekiwe elizolwa nokwanda kwamarabi kulesi sifundazwe. Kuleli thimba elizoholwa nguye kukhona uNgqongqoshe wezeMpilo KwaZulu Natal, uDkt Sibongiseni Dhlomo, owezokuPhepha uMnuz Willies Mchunu, owezeziMali uNkk Ina Cronje nowezokuBusa ngokuBambisana, uNksz Nomusa Dube.
“Ngesonto elizayo leli thimba lizoya enkantolo enkulu liyocela igunya lokungenela izindlu libheke ukuthi abantu bazigomile yini izinja namakati abo futhi libhekane nalabo abangakwenzile lokhu,” kusho uRadebe.