Usehlela imicimbi yasejele uzulu
KUBONAKALA eseyamukele ekugcineni impilo yasejele uSfiso Zulu njengoba eseqokelwe ekomitini langaphakathi lokuhlela imicimbi okuhloswe ngayo ukwakha ubuntu nokuxhumanisa imiphakathi nababoshwa.
UZulu uke waphuma engena esibhedlela ezama nokuzibulala ngoba ebalekela ukuyohlala ejele kodwa ubukeka manje esezinzile futhi esekwamukele ukudonsa ngaphakathi.
Ezinye zezigameko ezihambisana nemizamo yakhe eminingi yokubalekela ijele kube ukuzithanqaza efulethini ahlala kulo ePoint Waterfront ezama ukuzibulala.
Kuthe uma ehluleka kulokho wagcina esedlulisa icala ukuze kubuyekezwe isinqumo sokugwetshwa kwakhe kodwa wachithwa njengoba kuze kwafinyelela ekutheni avele azinikele.
UZulu uqokelwe ekomitini labantu abayisihlanu lokuhlela imicimbi ehambisana nemiqhudelwano esuke yenzelwe iziboshwa namalunga omphakathi.
Lokhu kulandela umcimbi obungeSonto lapho uZulu nethimba lakhe bebehlele khona umqhudelwano wesicathamiya nendlamu obekuncintisana kuwo iziboshwa nabantu abangamalungu omphakathi.
UMnuz Jeff Stuart wezokuxhumana ejele eMgungundlovu uthe inhloso yomcimbi obuhlelwa nguZulu nethimba asebenzisana nalo bekuwukugqugquzela ukuzwana nokujwayelana phakathi kweziboshwa namalungu omphakathi ukuze kube lula ukuthi zamukeleke emphakathini uma sezidedeliwe.
“Empeleni uZulu ayikho imali ayikhiphile ngalo mcimbi kodwa uyilungu lekomiti lasejele elibizwa nge-Offenders Sports and Recreation Committee , leli komiti lisebenza ngokubambisana nathi futhi abantu abakhethwa kulo yilabo abasuke beziphethe kahle nabaqokwa iziboshwa,” kusho uStuart.
Uqhube wathi lolu hlobo lo mcimbi liwuhlelo loMnyango wezokuHlunyeleliswa kweziMilo kanti ubuxhaswe usomabhizinisi uMnuz Themba Njilo.
UZulu akukapheli ngisho izinyanga ezintathu eboshiwe ngemuva kokuthi kube umzukuzuku ukuthi ayongena ezikhindini kulandela ukuthi agwetshwa iminyaka emithathu ngecala lokubulala ngokungenhloso izitshudeni ezimbili ezazibuya enkonzweni namanye amakholwa ngo-2008.
Ukungazinikeli kwakhe emaphoyiseni kwakhalisa abaningi njengoba nemindeni yezihlobo ezabandakanyeka engozini yemoto yakhe zamchaza njengomuntu ongenalo uzwelo ngoba zithi akakaze axolise ngokwenzeka.
Kule ngozi yemoto kaZulu iBMW X5 kwakukhona nabafundi abaphenduka izinkubela baseMangosuthu University of Technology ababeyingxenye yamakholwa ayebuya enkonzweni kanti yenzeka emgwaqeni uMasabalala Yengwa.