Umunyu kutholwa esinye isidumbu
KUBE usizi nomunyu emindenini nakubasebenzi bezeMvelo KZN Wildlife ngesikhathi kutholwa esinye isidumbu sesibili somsebenzi wale nhlangano abanyamalala ngoLwesihlanu emuva kokususa amanethi afakwa ngabantu abadoba ngokungemthetho echibini iNhlabane.
Isidumbu somsebenzi wokuqala sitholwe ngoMsombuluko kanye nesikebhe akade behamba ngaso.
Esesibili sitholwe izolo ekuseni bude buduze nalapho kutholwe khona esokuqala.
Izikhulu zezeMvelo zithe ichibi laseNhlabane lingaphandle kwaseRichards Bay kanti abashonile bebesebenza eNseleni Game Reserve kodwa nalo leli chibi lingaphansi kwabo.
Abashonile ngoMnuz Mbazwani Mhlongo (57), noMnuz Phumlani Mthembu (34) okusolakala ukuthi baminza ngesikhathi sebebuya beqeda ukususa amanethi ayebekwe ngabantu abadoba ngokungemthetho eNhlabane.
Ozakwabo bahamba ngezinyawo sebeya emavenini kanti bona bakhetha ukugwedla isikejana esasisechibini.
Ozakwabo baqala bakhathazeka ngesikhathi befika kuqala kunabo kanti bazama nokubafonela kodwa bangabathola kwabe sekubizwa amaphoyisa.
Esitatimendeni esithunyelwe ngabezeMvelo bathe asenziwe amalungiselelo okuthi imindeni iyohlonza izidumbu zabashonile emakhazeni kanti kulindeleke ukuthi bahlolwe nangudokotela ozothola imbangela yokufa kwabo.
Kulindeleke ukuthi abasebenzi akade besebenza nabafile bahanjiswe kudokotela wengqondo kanti nemindeni yabo izobonana nalo dokotela.
Umndeni kaMhlongo ubukhona ngesikhathi kucingwa izidumbu kanti okaMthembu kuthiwe usendleleni usuka KwaNgwanase.
Isikhulu esiphezulu sezeMvelo KZN Wildlife, uDkt Bandile Mkhize sithe baphatheke kabi ngokudlula kwalaba basebenzi futhi bazobakhumbula.
Ube esedlulisa amazwi enduduzo emindenini esho nokuthi bakanye nayo kulesi sikhathi esinzima.
Uphinde wabonga emaphoyiseni akade ecinga abasebenzi abashonile.