I-sanco ikhala ngokwenyuswa kwama-rates emsunduzi

UMASIPALA waseMsunduzi usuziphikisile izinsolo zokuthi awuzange uxoxisane nabantu ngaphambi kokwenyusa imali yama-rates ezindaweni ezingaphansi kwawo.

UMnuz Brian Zuma owengamele ezokuxhumana eMsunduzi uthe uma kuzokwenyuswa ama-rates kuye kube nezimbizo lapho kuxoxiswana khona nomphakathi.

Uthe kujwayelekile ukuthi uma kwenyuswa ama-rates kube nemibono ehlukile kodwa-ke akusekho abangakushintsha ngoba yonke into isiphasisiwe.

Ebuzwa ukuthi yini indaba sebekhokhisa ama- rates ngisho abantu abanemizi ebiza o-R125 000 akade bengawakhokhi kuqala, uthe: “Sibone ukuthi uMasipala waseMsunduzi ulahlekelwa yimali eningi ngokungabakhokhisi labo bantu abanemizi ebiza ngaphezu kuka-R100 000. Uma ubheka abanye omasipala bakhokhisa amarates ngisho imizi ebiza u- R90 000,” kuchaza uZuma.

Ube esecela abantu ukuba baqonde ukuthi ama-rates yiyona ndlela uMasipala akwazi ukubahambisela ngayo izidingo ngoba uma engakhokhwa ngeke bazithole izidingo ezifana namanzi nogesi.

Uthe labo abanemizi engaphansi kuka-R100 000 angeke bawakhokhe ama- rates kanti abadala asebehola impesheni bazothola izaphulelo ezisuka ku-33% kuya ku-40%.

Inhlangano ebhekele umphakathi i-Sanco iye yakhala kakhulu ngokunyuka kwama-rates isho nokuthi uma esebiza kanje abantu abampofu bazoba nezikweletu abangeke bakwazi ukuzikhokhela.

UMnuz Francis Grantam onguNobhala we-Sanco KwaZulu-Natal uthe anyuswe ngehaba ama-rates aseMsunduzi ngoba umuntu obekhokha u-R260 manje usezokhokha u-R833.

Uthe bazoba nokhukhulelangoqo wemashi kuleli sonto ukuze bafake ingcindezi kuMasipala ngalolu daba.