Kushiswe indlu yobulele umngani
KUSOLWA intukuthelo yamalungu omphakathi ngokushiswa komjondolo obuhlala owesifazane okhulelwe obhekene necala lokubhokoda ngommese abulale umngani wakhe wesilisa emuva kwengxabano ehostela KwaMashu.
Izolo ekuseni kushiswe indlu ewumjondolo ka Nksz Sixonxo Zinziswa Zenzi (25) umlilo wakapakela nakweminye imijondolo eshe yaphela.
Lona wesifazane onqatshelwe ibheyili ngoMsombuluko ubhekene necala lokubulala umngani wakhe uThabo Mokoena (21), okuthiwa ubemncokolisa kanti useyinyathele emsileni.
Kulesi sigameko sokusha kwalo muzi okusolakala ukuthi kukhona amalungu omphakathi awushisile kwagcina sekushe nezindlu ezingu-11 abanikazi bazo akade bengekho besemsebenzini.
Ngokusho komunye wesifazane okade ekhona kuleya ndawo olume indlebe Isolezwe, uthe kukhona abantu olubacasulile lolu daba lokubulawa kukaThabo base bethatha isinqumo sokushisa indlu yomsolwa.
Kuthiwa amalunga omphakathi aye kulendlu afike ayokhela ngomlilo abantu besalele ngenxa yokuthi abasamfuni lo wesifazane abuye endaweni njengoba esagqunywe ezitokisini ngaleli cala.
Ngokusho kukaMnuz Mzwakhe Ngidi, uthi babone lo mlilo usuvutha amalangabi nabo abazi ukuthi uqale kanjani.
“Ngabe nginamanga uma ngithi ngiyazi ukuthi uqale kanjani umlilo. Mina ngithe ngiphuma endlini ngabona ilangabi ngazama ukuthatha amanzi ngicime kodwa kwanzima njengoba ubusumkhulu kakhulu,” kusho uMnuz Ngidi.
Uthe babe sebebiza laba bantu akade bengekho besemsebenzini ukuze bazobheka ezindlini zabo ukuthi umlilo umoshe kanjani njengoba kwezinye kungaphumanga lutho.
UNksz Zenzi uzinikele emaphoyiseni emuva kokugwaza uMokoena. Ngesikhathi sokuloba lapha izolo amaphoyisa abesaphenya ngokushiswa kwendlu kaNksz Zenzi nezinye.