Lihlehlile icala kosolwa ngokudlwengula
LIHLEHLISELWE inyanga ezayo icala lomlisa osolwa ngokunukubeza ingane yowesifazane waseMlazi ahlekisana naye.
Umsolwa onguMnuz Linda Mtshali (26) zamkhalela ngenyanga ka-Ephreli kulandela ukuthi ugogo wengane (10) ohlala KwaMashu amvulela icala emaphoyiseni njengoba esola nokuthi unina wengane ubenolwazi ngalokhu kodwa engaphumeli obala.
Kuthiwa uMtshali ngaphambi kokuba aboshwe ubesenesikhathi eside ezitika ngokudlwengula le ngane kodwa isaba ukusho emndenini.
Kuthe ngesikhathi ugogo ezovakasha ngelinye ilanga wezwa zikhuluma zodwa izingane zithi akatshelwe ugogo ukuze nale ngane isizakale nokuholele ekutheni athinte amaphoyisa ngokushesha lo gogo.
Amaphoyisa aseBhekithemba amvulela icala lokudlwengula ambopha wabe esevela eNkantolo kaMantshi eMlazi izolo kodwa labe selihlehliswa leli cala.
Ngasekuqaleni kwalenyanga leli phephandaba labika ngosizi le ngane ebhekene nalo kulandela ukudlwengulwa izikhawu eziningi yilo mlisa oyisoka likanina kanjalo nokukhathazeka kwamalungu omndeni ngalesi senzo.
Ugogo wengane (65) ongeke adalulwe igama lakhe ngenxa yokuvikela ingane unokukhathazeka okukhulu ngomzukulu wakhe futhi uthi ufisa abolele ejele lo mlisa.
“Ngiyajabula njengoba egcinwe esitokisini lo mdlwenguli futhi ukuba kuya ngokwami ngabe uyagwetshwa, abolele ejele kuze kuphephe nezinye izingane ezisakhula.
Ngizokwenza konke okusemandleni ukusiza umzukulu wami akhohlwe nayilesi senzo,” kusho ugogo.
Amaphoyisa aKwaZulu-Natal athe leli cala lihlehliselwe uJulayi 19 ngenxa yokuthi kusenziwa uphenyo olunzulu.