Kuxabene ubendle kumalungu E-NFP
SEBEJIKELENE bodwa abaholi beNational Freedom Party ngenxa yokungezwani osekuholele ekutheni kubekhona abasengcupheni yokuxoshwa ngoba besolwa ngokuthinteka etulweni lokuketula uMengameli waleli qembu uNkk Zanele Magwaza-Msibi.
Laba baholi okungoNkk Bongiwe Gwala noNkk Angel Mthembu kuthiwa babuye basolwe ngokuthinteka ekusungulweni kweqembu okukholakala ukuthi lihlubuka ku-NFP ngenxa yokuthi abeneme ngokaMagwaza-Msibi nobuholi bakhe.
Le nkinga kuthiwa yiyona eholele ekutheni ubuholi beqembu buxoshe uMnuz Muzi Nyandeni obengusihlalo we-NFP eThekwini.
“Ngenxa yale nkinga nokuziphatha kwalaba baholi kugcine sekuthathwa isinqumo sokuthi kumele bakhishwe ebukhanseleni komasipala ukuze kubonakale ukuthi kungena bani. Ngaphandle kwalokho udaba lwabo luqale eMgungundlovu lapho okwakukhethwa khona ubuholi bukazwelonke nalapho baqala khona ukukhala ngoba bengabafuni abantu abakhethwa kuleyo ngqungquthela eyayingoDisemba,” kusho umthombo.
UNkk Gwala ngesikhathi ethintwa, uthe bake banxusa iqembu ukuthi libanikeze ubufakazi obubambekayo ngalezi zinsolo abahlanganiswa nazo kodwa behluleka.
“Thina singabantu bokuqala abaphumela obala ku-IFP ukweseka uMengameli nokwaze kwaholela ekutheni sixoshwe. Saphinde saba ngabokuqala ababephambili ngesikhathi kusungulwa i-NFP ngakho kuyethusa ukuthi kungathi sesiwe sivuka noZanele bese simjikela,” kusho uNkk Gwala.
Uthe inkinga ekhona ukuthi kunabantu abafike kamuva sekulunge konke kule nhlangano abafuna ukuyibulala futhi abafuna ukubona okaMagwaza-Msibi esesele yedwa ukuze bakwazi ukumjikela kahle.
UNkk Mthembu naye osolwayo uthe amanga akule nhlangano asexaka ngisho uMengameli wayo uqobo ngoba sekuhlale kusolwana.
Uthe useke wazama nokuthola imininingwane yaleli qembu abamataniswa nalo kodwa wathola ukuthi lasungulwa kudala ngaphambi kwe-NFP umuntu waseMajuba amgagule nangegama lakhe.
Eqhuba uthe yena akasaziboni egcogcoma namaqembu ezombusazwe ngoba usemdala okusho ukuthi uma ephuma ku-NFP uyobe esezihlalela phansi ekhaya.
UNobhala we-NFP KwaZulu-Ntala uMnuz Vusi Khoza, uthe kunomhlangano abazoba nawo njengobuholi besifundazwe ukuze balungise udaba lwaseThekwini kodwa azikho izinqumo ezithathiwe zokuxosha laba baholi abangamakhansela kuMasipala weTheku.
Uveze ukuthi udaba lwetulo nokuthi bathinteka kwenye inhlangano baluzwile kodwa lungamahlebezi abangeke bawanake ngoba akukho okuqondile asebeke bakuthola kabanzi .
Uthe uNyandeni bamxosha ngoba waba nokungaziphathi kahle waphula nemigomo yeqembu kanti akasavumelekile ukuba ekhulume egameni le-NFP.