Kusolwa amasela ngebhuloho eliwile
UMASIPALA weTheku usola amasela abefuna ukuthola izinsimbi ngokudilika kwebhuloho elisemfuleni uMngeni ngasebhishi eBlue Lagoon.
Ngokusho kukaMnuz Carlos Esteves obhekele ezemigwaqo kuMasipala weTheku, ngamasela abefuna izinsimbi abe nomthelela ekutheni kuwe ibhuloho.
Uthe lezi zinsimbi yizona ebezibambe ukhonkolo odilikile kanti ukususwa kwazo kudale ukuthi ukhonkolo usale ungenayo indawo yokubambelela.
Uqhube wathi ucwaningo lwabo aluvezi inkinga ekwakhiweni kwebhuloho nokuthi ubudala balo cishe yibona obenze ladilika kodwa okucacayo wukuthi ukususwa kwezinsimbi yikhona okuliwisile. NgoMsombuluko Isolezwe labika ngaleli bhuloho eliwile.
Ube esecacisa ukuthi amanye amabhuloho awekho engcupheni ngoba izinsimbi zawo zimbozwe ngokhonkolo.
Uthe abazi ukuthi amasela abefuna lezi zinsimbi angene kanjani ngoba le ndawo ibivaliwe kodwa-ke ngokuzayo bazomboza konke okusansimbi emabhulohweni.
Uthe kuzothatha isikhathi esingangonyaka ukulungisa indawo edilikile kuleli bhuloho.
Lokhu uthe kudalwa wukuthi mkhulu umsebenzi owenziwayo ngaphambi kokwakha ibhuloho.