‘Abantu ababheke ukuthi umsebenzi wobukhomishana ngiyawenza yini banganaki i-hair style’
UMA ngibuka zonke lezi zinto ezenzeka lapha eNingizimu Afrika ngivele ngithule ngifise sengathi uJesu angavuka azozibonela ngawakhe amehlo lezi zimanga esizibonayo. Uma sizwa, sifunda naseBhayibhelini kuyavela ukuthi izigemegeme zazehla imihla ngemihla, kudideke abantu kuze kusize yona iNdodana yomuntu ikhuleke. Njengamanje abantu basenkingeni, kwehla izehlo ezinkulu abathi bayazicabanga kube nzima kumane kuhambe umqondo ujubalale. Inkosi yasePhoyinti ingeze yazibala ngazinye izinsambatheka esezithe zenzeka kulesi sikhashana esingengakanani esedlule. Iqiniso elisobala okwezinqe zeselesele ngelokuthi ngisho abahlaziyi bezimo zenhlalo nezepolitiki sebehlulekile ukuchaza isiqalo nesiphetho sale migilingwane esibukiswa yona.
Sezehlile zonke izinto, kwakhala abakhalayo, kwahleka abahlekayo, uVolos ubone kufanele axoxisane noKhomishana uMangwashi Phiyega osanda kuqokelwa kulesi sikhudla esisha. Yize okaPhiyega engumuntu ohlala ejahile kodwa ukwazile ukuzithoba aphendule imibuzo ayibuziwe. Nanka amazwibela emibengwana yale ngxoxo ehlabahlosile:
Volos: (Ushaya indesheni) ngiyasalutha njalo weKhomishana Phiyega!
Phiyega: (uyamamatheka) Sibingelele nkosi yamaNu nabafundi beSolezwe.
Volos: Singakakhulumi kuyaphi, umuntu akaqale ngokuthi akuhalalisele ngokuqokelwa kulesi sikhundlakazi esinomlando ongemuhle.
Phiyega: Ngiyabonga, ngiyethemba sizosebenzisana kahle nomphakathi kwehle nezigameko zodlame nokwesatshiswa.
Volos: Ngesikhathi uqokelwa kulesi sikhundla kube nokuxokozela okuningi, kukhona nabathi asikufanele, ukuqokwa kwakho kube wufefe lukaMengameli uZuma. Kuthini ukuphawula kwakho ngalezi zinkulumo ezisabalele nemithombo yezindaba?
Phiyega: Hhawu Volos, uthi umuntu angasebenza uma engalibala ukunakana nezinkulumo zabantu? Okufanele kuqondwe ngabantu wukuthi lo msebenzi ngiwulungele futhi ngizowenza ngenhlonipho nangokuzimisela.
Volos: IsiZulu sithi ukufa kwenye indlu wukuvuka kwenye. Kungabe uzizwa unjani ngokuthi kuxoshwe uCele, wena ube sewuthatha isikhundla obekungesakhe?
Phiyega: (Ubambelela esihlathini) Ngokwazi kwami akekho umuntu ozalwa efumbethe isikhundla, isikhundla yinto oyiphathiswayo, uyephucwe uma kubiza ukuthi kwenzeke kanjalo. Ngingeze ngakuthanda ukuthi ngiphazanyiswe emsebenzini obalulekile okufanele ngabe ngiyawenza, ngibuzwe ukuthi ngizithathelani izikhundla zosibanibani.
Volos: Sibonge maPhiyega omuhle, kungaba ngenza iphutha uma ngingakubuzi ngale ndoda okuthiwa nguRichard Mdluli? Kafushane nje ungaphawula uthini ngoMdluli namacala awavulayo namlahlayo awedlulisele phambili?
Phiyega: Cha! Cha! Ngicela ungangifaki ezindabeni engingazazi zoMdluli ngoba kubuye kuthiwe baqopha nezinkulumo ezenziwa ngabantu.
Volos: Ngicela sibuyele emuva kancane, ngesikhathi uqokwa kwaba nezinkulumo nangendlela obukeka ngayo. Libe khona neqeqebana elikhale kakhulu ngehair-style yakho bathi ikhanda awulenzi, lokho okwenza ube nekhanda eliyisiqethevu ongathi ngelomnumzane eshaye amanhlakomuzi.
Phiyega: (Uyahleka) Waze wangihlekisa wemaBhavanocingo, kungani abantu bezikhathaza ngekhanda lami elingachochisiwe ngamafutha? Ngicela abantu bakhululeke bazi ukuthi umsebenzi awenziwa wukuthi umuntu upende izinzipho waphema nekhanda. Abantu mabangalibali wukubuka ukuthi ngenze amasingili amade noma amafushane, makubukwe ukuthi umsebenzi wobuKhomishina ngiyawenza noma angiwenzi.
Volos: Sengiphetha ngithanda ukubonga ngisho nokuthi sizijabulele kakhulu nezindaba zokuthi kunendodana kadadewenu esebenza kuMetro Police eThekwini.
Phiyega: ( Wenyusa izinhlonze) indodana kadadewuthu ewubani?
Volos: Igama layo ngu-Ayanda Msweli ohamba esabisa amaphoyisa ethi sekuphethe u-anti wakhe manje kufanele akhothanyelwe.
Phiyega: Hhayi bandla ngithanda ukuxolisa. Ngokwazi kwami udadewethu unamantombazane wodwa, akanayo ingane yomfana. Lowo Msweli othi ngingu-anti wakhe uziqambela amanga aluhlaza cwe. Uma kufanele athathelwe izinyathelo azithathwe ngokushesha angaze adlebeleke ahambe ewaka abantu izimali ngegama lami.