Kuncika ekutheni uyibekelani imali yakho
NJENGOBA ngasho ukuthi sizoqala sihlaziye ngezindlela ezikhona zokulondoloza imali kula masonto, okuye kwenzeka kimi wukubuzwa ngabantu ukuthi imali yabo kumele bayilondoloze kuphi?
Lo mbuzo uvuleke kakhulu ngoba ziningi izindlela zokubeka imali ezikhona ezimakethe. Konke lokhu okukhona kuncike ekutheni wena ufuna ukuyibekelani imali yakho.
Kuphinde kubukwe ukuthi ufuna ukuyibeka isikhathi esingakanani imali yakho?
Ngaphambi kokuthi sikuphendule kulokho kumele kwayikona ukubeka imali kube wumkhuba esiwujwayela sisafunda singakaqali ngisho ukusebenza.
Ukufika kobuchwepheshe bama-computer kudale ulwazi lokubeka imali lwasabalala, ngaleso sizathu kumele sizijwayeze ukufunda izingosi ezifundisa ngokuphatha imali.
Inqwaba iqeda emanyuvesi isibambeke ezikweletini ngoba isuke ingaziqeqeshanga ukubophela iRandi abalitholayo.
Uma ngabe sebesebenza lo mkhuba baqhubeka nawo.
Yebo kuhle ukuthenga izinto ezibizayo nezimoto ezinhle ukuzijabulisa uma usuqedile kodwa kuhle kakhulu ukuzibusisa ngokungabi nasikweletu empilweni yakho.
Uma ngabe ungasenaso uyakwazi ukuhlela ukuthi ufuna ukubeka imali engaka njalo uma uholile.
Uma ngabe usuyayibeka leyo mali, izoqala ikuhehe ekutheni ufune ukwenza izinto ezinkulu njengokuthi ufuna ukuthenga imoto ufake i-deposit enkulu okanye ufuna ukuthenga umuzi okanye ukushada emva kweminyaka emithathu.
Konke lokhu kuqhamuka kuphendule ukuthi imali ufuna ukuyibeka isikhathi esingakanani?
Uma ngabe usuwazi ukuthi ufunani emva kweminyaka emingakanani usuzokwazi-ke ukulondoloza ukhethe iinvestment ehambisana nawe.
Lapha ngiphendula lo mbuzo ovulekile umuntu ongibuza ocingweni okanye uhlangana naye ukuthi angayibekaphi imali yakhe?
Mina ngithi zithini izidingo zakho futhi uyidinga emuva kweminyaka emingaki leyo mali.
Engingakuphawula ukuthi imali uma uyibeka isikhathi esifishane nenzalo yakhona iba ncane, uma ngabe uyibeka isikhathi eside ezimakethe nenzalo iba nkulu.
Awunqatshelwe ukuyibeka izikhathi esifishane ngoba kungenzeka uyidinge ngokuphazima kweso.
Isibonelo: kungashona isihlobo okanye uqhunyelwe amathayi emoto phakathi nenyanga. Kuyadingeka uyithathe imali yakho.
Amabhange amakhulu kade ebhale kwelinye lamaphepha angesonto ngezinhlobonhlobo zokubeka imali wenzela isimo esingalindelekile.
Njengoba siluleka ngokubeka imali siyaye sinikhuthaze ukuvula isikhwama esisibiza nge-emergency fund okuyimali ongayidinga ngokushesha uma kuvela okuvelayo nakusasa.
Ngokwasezimakethe lemali itshalwa kuma-unit trusts abizwa ngokuthi ama-fixed income funds.
Kumele nilusebenzise ulwazi olugcwele khona nizokuqonda ukuthi imali ningayibeka kuphi uma niyidinga ngesikhathi mhlawumbe esifishane okanye eside.
Kokunye le mali iyaye ifakwe kwi-money market nokuyilapho uthola khona inzuzo engconywana uma kuqhathaniswa nalena etholwa kuma-fixed deposit.
Ngokuzayo sizohlaziya kahle ukuthi sikhuluma ngani uma sithi imali enye ikakhulu lena esizosheshe siyidinge kumele ihlale kuma-fixed interest funds kanti wona ayini ngempela?
Lapha ngingabala imali efana neye-deposit yemoto, i-deposit yendlu, okanye imali ongayidinga eminyakeni emithathu kuya kwemihlanu. Ngiphinde ngitholakale ku: 031-335-8330
NakuFacebook