Kuhlelwe ikhonsathi yowokholo ejesus Dome
UTHEMBISA abantu baKwaZulu Natal namaphethelo into yamehlo uVeliswa Skeyi ozobe engomunye wabaculi abazobe benandisa emcimbini ohlelwa indodakazi kaMdu Ngcobo weTouch Africa uWanita.
Lo mcimbi womculo wokholo ozoba ngoLwesihlanu eJesus Dome uzoqala ngo-7.30 kusihlwa uzobe ubophele abaculi abangaconsi phansi emculweni wokholo.
UVeliswa uthe ujabule kakhulu ukuthi aphinde athole ithuba lesibili lokuthi azonandisa emcimbini osuke ukulesi sifundazwe.
“Ngithokoze kakhulu njengoba nginabalandeli kulo lonke elakuleli kodwa angijwayele ukuculela abalandeli bami baseKZN,” kusho uVeliswa.
UWanita ohlela lo mcimbi uthe konke sekumi ngomumo okumchaza kakhulu ukuthi amathikithi ahamba kahle kumacomputickets.
“Umuntu ongakalithengi ithikithi akaphuthume ngoba adayiswa ubuthaphuthaphu,” kusho uWanita.
Le khonsathi okungeyokuqala ukuhlelwa ile ndodakazi kaMdu ibizwa ngokuthi, iGospel In You Concert.
Le khonsathi izobe ibophele abaculi asebezakhele igama endimeni yomculo okungabalwa kubona oHlengiwe Mhlaba, Sfiso Ncwane, Lusanda Spiritual Group, Veliswa noThabile Myeni.
UWanita uthe ukhethe ukwenza ikhonsathi yowokholo ngoba akafuni ukubangisa ubaba wakhe ezintweni azenzayo.
Uthe okumenze wagxila kakhulu kubaculi bangaphandle kwesifundazwe saKwaZulu Natal, yingoba babagcina ukubabuka komabonakude bangasitholi isikhathi sokuthi beze kubo.