Kuzofiwa imetro Sunday Session ecoastlands
UMSAKAZO wakwaSABC ongenisa inzuzo iMetro FM ihlele indumezulu yomcimbi ozokuba seCoastlands Hotel ngoJulayi 8.
USiyanda Tshabalala odume ngoDJ Siyanda nokunguyena ohlela lo mcimbi uthe abantu abaningi kudala bembuza ukuthi kanti u-Eddie Zondi, Wilson Nkosi noPaul Mtirara bavakashela izindawo ezinjani njengoba nabo bethanda ukuthi bazobadlalela izingoma zothando la eThekwini. Laba basakazi sebezakhele olukhulu udumo ngento abayibiza ngeMetro FM Sunday Sessions, bathi uma beqeda e-studio bavakashele izindawo ezehlukahlukene lapho befike badlale bukhoma umculo abawudlala ezinhlelweni zabo.
“Ngihlangane nala madoda ngabuza ukuthi kukhona yini esingakwenza kuleli dolobha ngoJulayi 8, zathi zonke zizobe zikhona, futhi zingakuthokozela kakhulu ukudlalela abantu bakuleli dolobha,” kusho uDJ Siyanda naye osebenza kulo msakazo.
Uthe ngaphandle kwalaba basakazi kuzokuba khona u-Ismael Ibrahims nabanye boDJ abasuka kulesi sifundazwe. UDJ Siyanda ozobe edlala naye uthe kuzoqala zona lezi zinkunzi ngomculo wothando opholile, kuzothi uma sekuhlwa sibe sesinyuka isigqi njengoba kuzongena oDJ abaziwa ngokudansisa abathandi bobumnandi.
Uphethe ngokuthi kuzoba mnandi kakhulu kulo mcimbi okuzongenwa kuwona ngo-R150.
“Okubalulekile ukuthi kuzoshiswa nenyama, abantu bangazihluphi ngokuphatha iziphuzo zabo ngoba zizobe zikhona,” kusho uDJ Siyanda othe ngalo mcimbi bazokube bezama nokuthoba izidubulo zomjaho wamahhashi.