Baphoxekile ngokuhlelwa kowogu Jazz
NGEKE aphinde alubhade kuGu Jazz Festival umculi waseThekwini ongaconsi phansi kwabaningi, uZakes Bantwini ngenxa “yokungahleleki” kwayo.
Lokhu kushiwo yimenenja yalo mculi, uLindani Mngoma, othe kumele kushintshwe inkampani ehlela lo mcimbi, iCyassound Events kaSiya Msomi.
USiya uvumile kwiSolezwe ngoLwesibili ukuthi izinto azihambanga njengoba bebehlelile ngenxa yesiminyaminya sezimoto, kanye nemvula ebina izikhawu.
UMngoma uthe bekumele bangene esiteji ngo-3 entathakusa lapho ababezocula khona ihora lonke kodwa baze bafakwa ngo-6 ekuseni kwathiwa abashaye ingoma eyodwa bese kuyavalwa.
“Lokhu kwasenza sabukeka kabi ngoba abantu abazange batshelwe ukuthi kwenzekani ngakho babona sengathi siyabaqola. Akukhona okokuqala ngoba nanyakenye kwenzeka esifanayo.
“Engingakusho wukuthi ngeke sisawuthatha sisaya kocula laphaya uma kuseyilaba bantu abayihlelayo ngoba ekugcineni sibukeka kabi kubathandi bomculo ngoba bona basuke bengazi ukuthi kwenzekani. Asazi ukuthi ngokuzayo bazosigilani (abahleli bomcimbi), yingakho sithathe lesi sinqumo,” kusho uMngoma othe ngeke avume umculi wakhe azenze inhlekisa kubantu.
Uthe lento yenzeka kule khonsathi kuphela ngoba kwamanye amakhonsathi anjengeHazelmere Jazz Festival, Cape Town Jazz namanye, kuhamba kahle.
“Isiphatha kabi le nto ngoba ilimaza isithunzi injalo. E-KZN yisekhaya, yilapho okufanele ngabe sijabula khona. Okunye wukuthi sithe sesiqeda ukucula sathola ukuthi kasinayo indawo yokulala kanti nabashayeli bezimoto obekuthiwa sizohamba ngazo bathe ngeke bekwazi ukunyakaza ngenxa kaphethiloli owawungekho,” kusho yena.
Uphethe ngokuthi ngeke bawudube lo mcimbi ngoba benzela abathandi bomculo kodwa ngeke baye uma ungahlelekile.
Ukungahleleki kulo mcimbi kuphinde kwagqama kakhulu ngesikhathi obekufakwa ngaso abaculi, kungene iMalini ngabo-3 ntambama, kuthathe isikhathi eside ukuthi kulandele elinye iqembu elinohlonze. UMdu weMalini, uthe kwabaphatha kabi njengoba babazi ukuthi bazocula ngabo-5.20 kodwa kwafakwa bona ngabo 3 ngoba kungekho abazocula.
“Asizange siphatheke kahle kuGu. Okunye kwaba wukuthi amabhande okungena etendeni labaculi asilitholanga kwaphoqeleka ukuthi sime emphakathini,” kusho uMdu.
USiya uthe isibalo sabathandi bejazz sikhula kakhulu, wathi kungaba kuhle ukuthi kutholakale indawo enkulu yokwenza lo mcimbi ngokuzayo.