Izingozi zomgwaqo ethekwini
KULIMALE abantu abayisikhombisa ngesikhathi kushayisana izimoto ezine ku-N3 ngasePavilion izolo ekuseni. Abakwa-ER24 bathi bafike kule ndawo bathola izimoto ebezibandakanyeka kule ngozi zilimele kakhulu.
UDerrick Banks uthe omunye wabagibeli ubevaleleke kwi-Golf ebomvu elimele kanzima.
Kudingeke ukuthi abezicishamlilo basebenzise izindlawu ukuthi bamkhulule kule moto. UBanks uthe abanye ababili bebelimele kanzima, abane bathola imihuzukwana.
Abalimele banikwe usizo oluphuthumayo endaweni yesigameko base bethuthelwa ezibhedlela ezehlukene eThekwini.
Uke wavalwa isikhashana umgwaqo emuva kwale ngozi.
Khonamanjalo ngoMsombuluko ebusuku kulimale abantu abayisikhombisa okubalwa kubo nezingane ezineminyaka eyisithupha nengu-12 ngesikhathi kushayisana izimoto ku-N2 ngaseMhlanga.
Kuthiwa iloli lifele kule ndawo, ngaseSummerset Park, iVW ibe seyehlisa ijubane ngesikhathi ibona leli loli kanti izoshayiswa iJetta.
Abezimo eziphuthumayo bathe bafice umndeni wabayisithupa ukwi-Golf, abaselisa ababili bekwiJetta, banikwe usizo lokuqala babe sebephuthunyiswa ezibhedlela eziseduze.
Kwenye ingozi eyenzeke ngoMsombuluko ebusuku kushone umuntu oyedwa ngaseWestville emuva kokugingqika kwemoto.
UBanks uthe bafike endaweni yesehlakalo bathola imoto ngasemfuleni, umshayeli wayo epitshizeke ngaphansi.
Lo mshayeli kutholakale ukuthi useshonile, kanti kusolwa ukuthi uhlulekile ukulawula imoto washayisa ucingo lokubiya, imoto yawela emfuleni yase imchitha.