Owedurban Ladies uxakwa wukungabizwa kwibanyana
INSEPHE yeDurban Ladies uSlindile Ngubane, uxakwa ngumqeqeshi weBanyana Banyana uJoseph “Skheshekheshe” Mkhonza omshaya indiva yize elokhu ewabasela njalo amagoli enethini okuyinto okuhlezi kukhalwa ngayo kwelesizwe.
UNgubane (25) ubevutha engabaselwe ezakhe zitalabha i-Als Pak Tawana, yaseNorth West ngo 9-1 eKing Zwelithini Stadium emdlalweni wokuqala weDurban Ladies weSasol League National Championship ngoMsombuluko.
Utshele leli phephandaba ukuthi kuyammangaza ukushiywa ngaphandle eqenjini lesizwe ekubeni azi kahle ukuthi igoli lishaywa kanjani.
“Ngendlela engidlala ngayo kungifanele ukuba eqenjini lesizwe. Kade ngangizikhandla, noMkhonza uyazi ukuthi ngizimisele kangakanani. Angikwazi okwenza ngisale ngaphandle njalo uma ebiza iqembu lesizwe,” kusho uNgubane.
Amagoli eDurban Ladies ahlohlwe, uZamandosi Cele amabili , Dombi Thabethe elilodwa, Charlotte Mshengu naye elilodwa, uNgubane washaya amahlanu.
Elokubika leTawana liqhamuke noMosego Ntoagae.
UNgubane waseMpophomeni eHowick akalona neze ivukana ebholeni labesifazane, waqala kwiDambuza Ladies kodwa lagcina lishabalele leli qembu.
“Umqeqeshi wami ngaleso sikhathi wangithatha wangiletha Ladies ukuze ngizoqhubeka ngidlale. Ngafika kwiDurban Ladies ngangazibeka phansi ngadlalela ukufa nokuphila. Ibhola liyimpilo yami,” kusho yena.
IDurban Ladies iyaziwa ngokukhiqiza inqwaba yabadlali beBanyana Banyana okubalwa kubona u-Amanda Dlamini ongukaputeni, Zamamandosi Cele, Memory Makhanya, Nondyebo Mgudu nabanye abaningi.
UMkhonza ebuzwa ngoNgubane uthe umazi kahle kamhlophe futhi ungomunye wabadlali abasezinhlelweni zabo.
“Ngambona e-FreeState ngonyaka odlule kuyo iSasol League National Championship. Inkinga kwaba wukuthi udlala kahle kakhulu kweminye imidlalo bese kweminye angabonakali. Bengisabheka ukuthi uyakwazi yini ukuqhubeka ngendlela adlala ngayo angalehlisi izinga,” kusho uMkhonza.
Lo mqeqeshi usabathungatha namanje abadlali azobasebenzisa kwiBanyana njengoba efuna iqembu lakhe lande ukuze engeke ashodelwe ngabadlali ababukhali emapalini.
Ukushaywa ngomzimba kukaNgubane nguMkhonza kumenze wakulambela kakhulu kunakuqala ukugijima kwelesizwe nathi nakanjani uma ebizwa ngeke bakholwe yibhola ayobadlalela lona.
I-Durban Ladies izodlala umdlalo wayo wesibili neBloemfontein Celtics namuhla ngo-3 ntambama. IMIPHUMELA YEMIDLALO: NgoMsombuluko Bloemfontein Celtics 10- 2 RC Mills Durban Ladies 9-1 Als Puk Tawana Izolo: Palace Super Falcons 5–0 City Lads Als Puk Tawana 10–1 RC Mills Bloem Celtic 9-1 Msiphuya Ladies Kanatla 0-3 Cape Town Roses