Ucasillas ethubeni lokuqopha umlando
USETHUBENI lokuqopha umlando ongakaze wenziwe ebholeni okuwukunqoba imidlalo eyikhulu ezingeni lomhlaba ukaputeni weSpain, u-Iker Casillas, omatasa namalungiselelo e-semi final ye-Euro 2012 nePortugal namuhla eDonbass Arena, eDonetsk ngo-8.45 ntambama.
UCasillas, ozobe edlalela iSpain izikhawu eziwu-136, uzokuba wumdlali wokuqala emhlabeni ukunqoba imidlalo engu-100 uma ephumelele ukunqobisa ezakhe kuPortugal eholwa wuzakwabo kuReal Madrid, uCristiano Ronaldo.
Ukunqoba kweSpain lapha komakhelwane bayo iPortugal esabashaye kanye emidlalweni eyisikhombisa edlule kuzonika ezikaCasillas ithuba lokuba yizwe lokuqala ukunqoba kabili lo mqhudelwano kulandelana ekubeni kukhona nesicoco seNdebe yoMhlaba abayithathe ngo-2012 kuleli.
UCasillas uzwakalise ukuthi nakuba uRonaldo engakafiki ezingeni aziwa ngalo kodwa uzokuba yinkinga kubona kulo mdlalo.
“Indlela adlale ngayo kuMadrid ikukhombise ngokusobala ukuthi ungumdlali onjani futhi uyingozi kangakanani uma ephethe ibhola. Angikholwa wukuthi usefikile efomini yakhe yangesizini edlule kodwa uma singamqaphile sizozisola,” kusho lo nozinti oneminyaka engu-31.
Lo kaputeni ukhuluma kanjena nje kufanele ngoba indlela uRonaldo adlala ngayo kulo mqhudelwano ikukhombisa ngokusobala ukuthi uzimisele kangakanani ukuthola isicoco sakhe sokuqala emidlalweni yamazwe ngamazwe.
KweyePortugal esiyidlale kwiEuro yalo nyaka uRonaldo useyitakule kabili inqoba kuNetherlands kweyamaqoqo nakuCzech Republic kweyamaquarter final.
Okunye okukhalisa uCasillas ukuthi ibhola lenza into ayifunayo emoyeni uma lishaywe ngumuntu ofana noRonaldo kwazise unendlela yakhe yedwa yokukhahlela ibhola.
“Nakuba linganyakazi njengoJabulani (okuyibhola ebelisetshenziswa kweyeNdebe yoMhlaba ebikuleli ngo-2010) kodwa uyaphazamiseka uma ungabhekile kahle,” kusho uCasillas.
Olunye ulwazi: Euro.com