Kubanjwe umoya kumaplay-off ENFD
AKUBUZWA ukuthi babambe umoya abaqeqeshi bamaqembu amathathu ayingxenye yemidlalo ye-Absa Premiership/NFD Promotional Playoffs njengoba selidumela emansumpeni ngeqembu elizonyukela esigabeni esikhulu ngesizini ezayo.
UNeil “Mokoko” Tovey weThanda Royal Zulu eqede endaweni yesithathu kuNational First Division (NFD) kwathi uRoger Sikhakhane weChippa United wavala isizini yeNFD endaweni yesibili kanti uMart Nooij weSantos uvale isizini sekuvalwe amehlo ihlezi endaweni ka-15 ku-Absa Premiership, yinto engangatshazwa ukuthi ubuthongo ababazi laba baqeqeshi kulezi zinsuku njengoba amaqembu abo esethubeni lokunyukela esigabeni esikhulu. THANDA ROYAL ZULU:
IThanda iyona ezihola phambili ngamaphuzu amane ngemuva kwemidlalo emithathu. Baguqiswe yiSantos eRichards Bay Sport Complex ngo 1-0, babambana ngo 1-1 neChippa United eKapa njengoba beshaye iPeople’s Team ngo 2-1 eKapa ngempelasonto.
Uma iThanda inqoba izohlala esicongweni ngamaphuzu ayisikhombisa ngemuva kwemidlalo emine. Lokhu kuzosho ukuphela ngeChippa ehlezi endaweni yokugcina ngamaphuzu amabili ngemuva kwemidlalo emibili.
AmaBhubesi kuzomele amincele ukuthi iChippa idlale ngokulingana uma isihlangana neSantos ePhillipi Stadium ngoMgqibelo ngo-3 ntambama. Uma iSantos ibanjwa yiChippa ngoMgqibelo bese iThanda ishaya iChippa kusasa, nakanjani abafana bakaTovey banyukela kuPremiership.
Enye indlela iThanda enganyuka ngayo wukuthi bashaye amagoli angaphezu kwamabili bese bethandazela ukuthi iSantos inqobe ngegoli elilodwa. Lokhu kuzokwenza la maqembu alingane ngamaphuzu ayisikhombisa kodwa iThanda izodlula ngenxa yamagoli angcono kuneSantos.
Uma iThanda ingadlala ngokulingana izoba namaphuzu amahlanu, osekumele ikuthandazele uma idlala ngokulingana wukuthi iChippa ishaye iSantos. Uma iThanda idlala ngokulingana neSantos ibanjwa, kuyolawula ukuthi badlale ngokulingana ngamagoli amangaki. SANTOS:
Kuzomele imincele ukuthi iThanda idlale ngokulingana neChippa yona bese inqoba owayo neChippa ngoMgqibelo.
Enye indlela abangabuyela ngayo kuPremiership wukuthi iChippa ibashayele iThanda bona bese benqoba oweChippa noma badlale ngokulingana.
IThanda uma inganqoba ngegoli elilodwa, bese iSantos inqoba ngamabili (iSantos) iyabuyela kuPremiership. Uma iThanda ingadlala ngokulingana ngo 0-0 bese iSantos idlala ngokulingana ngo 1-1 noma ngaphezulu nakanjani bayabuya (iSantos) kuPremiership. CHIPPA:
Kumele inqobe yomibili imidlalo yayo eyisalele. Uma ingashaya iThanda kusasa bese ishaya iSantos ngoMgqibelo indlela ebheke kuPremiership ivuthiwe.
Uma bengadlala ngokulingana neThanda namuhla kumele bashaye iSantos.