Uzanyelwa elaphesheya ujali
IYAVUTHWA indlela yesithandwa sabalandeli beOrlando Pirates u-Andile Jali ebheke phesheya kwezilwandle ngemuva kokuthi usihlalo waleli qembu u-Irvin Khoza eveze ukuthi bavule izandla emaqenjini amgaqele.
UKhoza obekhuluma ngemuva kokwethula abadlali abasha bePirates ngoMsombuluko akazange akufihle ukuthi ngeke bame endleleni kaJali uma kukhona iqembu elimfuna ngabakubona kumfanele (imali) lo mdlali ophinde ayibambe nakuBafana Bafana.
Okunye okuqinisa lokhu ukuthi kulaba badlali uKhoza abezobethula kukhona noOnyekachi “Tico” Okonkwo odlala indawo efanayo nekaJali okuyizinkomba zokuthi iPirates kayizimisele ngokuzithola inenkinga uma lo mdlali egcina ehambile.
“Ngeke nangengozi sime endleleni yomdlali uma abamfunayo besinika lokhu esicabanga ukuthi kumfanele lo mdlali. Ungumdlali weqophelo eliphezulu ngakho-ke neqembu elimfunayo kufanele lize lazi ukuthi lithenga umdlali ohamba phambili,” usho kanje uKhoza.
Kuvela ukuthi uJali ufunwa amaqembu aseGermany ngokunjalo nawase-England kodwa alikho elisaphumele obala labeka okuthile etafuleni.
Indaba yokuvuthwa kwendlela kaJali iqinisekiswe uPashalis Tountouris oyisikhulu esiphezulu kwaProsport International, ephethe izindaba zalo mdlali, ozinze eLondon, e-England.
Ngesikhathi ekhuluma neSolezwe izolo eseLondon uthe: “Simatasa sikhuluma namaqembu amaningi afuna uJali. Akekho ongazi ukuthi uwuhlobo luni lomdlali ngakho-ke akusethusi ukuthi ufunwa amaqembu amaningi. Alikho esisavumelene nalo ngokuthile okuyikona okwenza ukuthi kungabi khona okubambekayo kodwa kuyethembisa.”
Ujobelele ngokuthi benza konke okusemandleni ukuthi uJali athole amadlelo aluhlaza.
Nakuba kunzima ukuthola amaphepha akuvumela ukuthi usebenze e-England kodwa kubadlali abanethalente eliyisimanga njengoJali kukhona okwenziwayo bawuthole umsebenzi.
UJali usesize iqembu lakhe iPirates yathatha izinkomishi eziyisithupha ngamasizini amabili kanti uhlale ekhona kuBafana Bafana.