Ukhuse ukhala ngokushiya kukatinashe
LIKHALA ezimathonsi iphini lomqeqeshi weKaizer Chiefs uDonald “Ace” Khuse ngokuhamba isigubhukane kwenjini yaleli qembu uTinashe “Washington” Nengomasha.
Lo mdlali waseZimbabwe usejoyine u-Aaron “Mbazo” Mokoena noTlou Molekwane abasanda kusayina kuBidvest Wits.
UKhuse, oyibambe ngokuhlanganyela noDoctor “16V” Khumalo njengamaphini omqeqeshi omusha uStuart Baxter, uthe ukhala uyazithulisa ngoba unovalo ngomkhaya ababili bakaWashington abazobahlola ukuba bavale ngabo lesi sikhala.
“Sinabadlali ababili abangaphakathi eqenjini, uWillard Katsande noLincoln Zvasiya, okuyibona abasahamba phambili ukuba badlale kule ndawo. Kunokungabaza nokho ngoba uZvasiya ufike kuthina vele ezokwelama uNengomasha kodwa wadlala emuva, namanje angiboni ukuthi usekulungele ukuthi usengaqala kule ndawo. Okwamanje sisanda kubuya, nakanjani kusekuningi okudingwa ukuhlolwa ngaphakathi,” kusho uKhuse.
Lo mqeqeshi uthe kusenokudideka okwamanje ngoba akekho umuntu obekulindele ukushiywa nguNengomasha obesedlale imidlalo engaphezu kwengu-300 kuleli qembu laseNaturena eliphezu komzabalazo wokubuyisa isithunzi salo kule sizini.
Nokho iChiefs isanda kusayinisa uSiyabonga “Doctor” Nkosi osuka kuLamontville Golden Arrows nokuvela ukuthi uzodlala unombolo 10 obugqokwa nguMthokozisi Yende obeyifenisha nosesayine kuMaritzburg United.
Ngaphezu kwalokho esiswini AmaKhosi anoReneilwe “Yeye” Letsholonyane noLucky “Sheriff ” Baloyi abebeyibamba noNengomasha enkabeni yenkundla.
UKhuse uthe ngenxa yokuthi bakuqabuke emaphepheni nabo ukushiya kukaWashington, abanazo izinhlelo zokumtheza ngaphandle lo mdlali.
“Kuzocaca kahle kusasa ukuthi siyadinga yini ukufuna omunye umdlali ngaphandle. Uma bengalungi uKatsande noZvasiya mhlawumbe kungathuka sekuvunyelwana ngokuthi akubizwe omunye umdlali kwelinye iqembu. Nomqeqeshi ubengakaphakamisi muntu,” kusho uKhuse.
Lo mqeqeshi uthe kungamampunge ukuthi iChiefs ike yafuna uLehlogonolo “Vierra” Masalesa, osesayine neGenk yaseBelgium esuka kuWits.
Ukuhamba kwale njini kuChiefs akuhlukile nakancane kunokukaThabo “Tsikitsiki” Mooki, Neil “Mkhukhu” Tovey noPatrick Mabedi, Arthur “1011” Zwane bonke abashiya kukhalwa eNaturena futhi bengahlonishwanga ngendlela owakulindelwe ngayo yize badlala iminyaka eminingi kuleli qembu ngokwethembeka.
NjengoMooki noTinashe uthenjiswe indumezulu yomdlalo wokumvalelisa kodwa okubukeka emancane amathuba okuthi naye awuthole.
Ukuhamba kwalo mdlali kuwukuqhuma kwethumba elilokhu lavuvukala encishwa isikhundla sobukaputeni ngumqeqeshi omdala uVladimir “Vikizembe” Vermezovic.