Umusona umataniswa nenkohlakalo
SEKUQUBUKE omunye umsindo ngenkohlakalo yokuphekwa kwemiphumela yemidlalo eZimbabwe lapho kuvela khona negama likaKnowledge Musona ozakhele olukhulu udumo esagijima kuKaizer Chiefs.
Kulokhu usoseshini ophethe ibhola lakuleliya lizwe iZimbabwean Football Association (Zifa) usuthole okukhulu ukugxekwa ngokumatanisa lo mkhuba noMusona.
Abakhala ngakho kakhulu ukuthi lo soseshini awukaphumeli obala ngomphumela wophenyo lomkhonyovu wokuphekwa kwemidlalo okwenzeke eminyakeni edlule owaziwa ngele-Asiagate.
Bangaphezulu kwekhulu abadlali abasolwayo kulo mkhonyovu njengoba sekuvela igama likaMusona ezinsolweni ezinstha.
UPaul Gundani osephethe inyunyana yabadlali futhi owake wadlalela iqembu lesizwe laseZimbabwe, ukhwele wadilika kulo soseshini ngokufaka amagama oMusona no-Ovidy Karuru ezinsolweni zakamuva.
Kuthiwa lo soseshini usola uMusona noKaruru ngokuba yingxenye yetulo lokuphekwa kwemiphumela yemidlalo yaleli qembu lesizwe yokuhlungela ukungena kweyeNdebe yoMhlaba ka2014 ezobanjelwa kwelaseBrazil.
Kowokuqala iZimbabwe ishaywe yiGuinea ngo 1-0 yabuye yadlala ngokulingana neMozambique emdlalweni owawusekuhambeni.
UGudani uthe, abaphathi bebhola eZimbabwe abayeke ukucasha ngalaba badlali ngoba behlulwa ukuphumela obala ngemiphumela yophenyo lwe-Asiagate.
“Uma behluleka ukusinika lokhu esikufunayo abasho. Bangalokothi bangcolise amagama abadlali bethu abasigqamisayo. Laba badlali baholelwa kahle emaqenjini abo ngakho-ke abayiyeke nje le nto yokubamatanisa nalo mkhonyovu,” kusho uGudani.
Lolu daba seluze lwangenwa nawuDavid Coltrat onguNgqongqoshe wezeMidlalo nokuNgcebeleka kuleliya lizwe osole iZifa ngokuqhamuka nezindaba ezithusayo ekubeni bengakalitsheli izwe ngokwenzeka ku-Asiagate.