Uthushuke enaturena umathoho izolo
UQALILE izolo ukuziqeqesha neKaizer Chiefs uEric “Tower” Mathoho obese kukhulunywe kakhulu ngaye neqembu azokube egijima kulona ngesizini zayo.
UMathoho weBloemfontein Celtic ubemataniswa nompetha be-Absa Premiership iOrlando Pirates, Mamelodi Sundowns neChiefs kanti ubengakufihli ukuthi leli qembu laseNaturena yilona alizwa ngaphakathi.
Ukubonakala kukaMathoho eNaturena izolo lapho iChiefs ibihlangene khona okokuqala ngaphambi kokwenza amalungiselelo esizini ezayo kuqinisekiswe yimenenja yakhe uTim Sukazi.
Abazibonele uMathoho ejima nozakwabo abasha baveze ukuthi unikwe unombolo 3 nakho akuqinisekisile uSukazi ngesikhathi ethintwa yileli phephandaba.
“Kuliqiniso ukuthi uMathoho uqalile ukuzicija neChiefs. Akufihliwe ukuthi umfana uthanda iChiefs futhi angasayina kuyona noma nini. Sithathe isinqumo sokuthi aqale ukuzilolonga nayo yize engakasayini ngokugcwele ukuze abe ejwayela indlela izinto ezenziwa ngayo kuMakhosi,” kusho uSukazi ophinde wakuqinisekisa ukuthi nanamuhla lo mdlali uzokube ezilolonga neChiefs.
Ebuzwa ngokuthi yini ebambile ukuthi lo mdlali amenyezelwe njengomdlali omusha weChiefs, uSukazi uthe, konke sekulele emaqenjini womabili.
“Seneme kakhulu ngokubekwa yiChiefs etafuleni. Osekubambile yizinto ezincane eziphakathi kwamaqembu womabili futhi enginesiqiniseko sokuthi zizolunga,” kusho yena.
Kuthintwa uKhumbulani Khonco weCeltic uthe, bayazi ukuthi uMathoho uziqeqeshe neChiefs izolo kodwa ngeke bathuke futhi uma eshintsha aziqeqeshe neMamelodi Sundowns nayo esesembangweni.
“Akukho okusha ngaphandle kokuthi siyaxoxa nawo womabili la maqembu (Chiefs neSundowns) ngomdlali. Okuyinkinga encane lapha ukuthi izingxoxo zihamba kahle nhlangothi zombili,” kusho uKhonco.
Nakuba lesi sikhulu sikhuluma ngale ndlela kodwa uSukazi uyafunga ukuthi uMathoho ngeke asayine kuSundowns ngisho ngabe imfuna ngamalini.
“Akuyona imali indaba lapha. Umdlali ufuna ukudlalela iChiefs, hhayi elinye iqembu njengoba ebhalele usihlalo wePirates u-Irvin Khoza emtshela ukuthi ngeke abajoyine ngoba unothando lokudlala eNaturena, hhayi kwenye indawo,” kusho uSukazi ejobelela ngokuthi umzuzu nomzuzu odlulayo usondeza uMathoho nephupho lakhe lokudlalela AmaKhosi.
Ayizange iphumelele imizamo yethu yokuthola uBobby Motaung oyimenenja yeChiefs ukuthi aphawule ngalolu daba ngoba ubenele ezwe ukuthi uthintwa ngendaba kaMathoho aluvale ucingo lwakhe.
Kusasa iChiefs izoba nesithangami nabezindaba lapho umqeqeshi wayo omusha uStuart Baxter ezokhuluma khona okokuqala nezintatheli. Ngokwesitatimende esithunyelwe yiChiefs izolo izophinde yethule abadlali bayo abasha kwabezindaba khona kusasa.
Njengoba uMathoho esevele wathushuka eNaturena maningi amathuba okuthi kusasa amenyezelwa nabanye abadlali ezogadla ngabo ngesizini ezayo iChiefs.
Khonamanjalo izolo iMaritzburg United yethule ngokusemthethweni uMthokozisi Yende obegijima kuChiefs osayine inkontileka yeminyaka emithathu. Bekuvele kungasacaci kahle ngoYende kuChiefs ongadlalanga imidlalo eminingi ngaphansi kukaVladimir Vermezovic kuleli qembu.
Abanye Abadlali asebezogijima kuTeam of Choice uDelron Buckley, obedlala kuKarlsruher eGermany no-Orlando Smeekes okubikwa ukuthi ungumgadli odabuka eNetherlands.
IMaritzburg kulindeleke ukuthi idayise uDiyo Sibisi oseveze ukuthi akasafuni ukudlala kuleli qembu.
ITeam of Choice iphinde yamemezela uUmbro njengabaxhasi bayo bejezi abasha.
UKurt Lentjies obekuMaritzburg usayine kuBloemfontein Celtic.