Kucijwa othisha bemaths nesayensi
BADELE amaholidi abafundi nothisha basezikoleni ezehlukene KwaZulu-Natal baphuma bayofuna ulwazi njengoba usha umshikashika wokufunda nokufundisa ezikoleni.
Othisha basezikoleni ezingaphansi kwesifunda uMlazi esenza kahle minyaka yonke kwaMatric, babuyele emadeskini bacijwa ngeMaths neSayensi ukuze babuyele ezikoleni zabo bayoncelisa abafundi embeleni ogwansile njengoba nezivivinyo zikaMatric seziseMome.
INhloko yoMnyango wezeMfundo KwaZulu-Natal, uDkt Nkosinathi Sishi, iphume umkhankaso wokuhambela izikole okufundwa kuzona izolo eMlazi naseMbumbulu.
USishi uqale eMangosuthu University of Technology lapho kuqeqeshwa khona othisha ezifundweni iMaths neSayensi.
Ube esedlulela eNdukwenhle High, eyathola u-15% nyakenye kwaMatric naseSibusisiwe Comprehensive eMbumbulu lapho kuhlangene khona izikole ezevile kwezinhlanu njengoba kufundwa ngala maholidi.
USishi uthe lolu hlelo lokufunda akafuni ukuthi lume uma sekuvulwa izikole kodwa luqhubeke kuze kuqale ukubhalwa kwezivivinyo ngoOkthoba.
“Sinenselelo ngenxa yokungenzi kahle kwabafundi ezifundweni iMaths neSayensi ngakho ukucijwa kothisha ukuze babuyele ezikoleni zabo bayotshala ulwazi kunginika ithemba lokuthi izinto zizohamba kahle. Into engijabulisayo kakhulu manje wukuthi kulezi zikhungo okufundelwa kuzona kulo nyaka kwenziwa izinto ezibalulekile okubonakele ukuthi zaba yinkinga nyakenye kubafundi,” usho kanje.
Uthe othisha abafunda ngala maholidi bacijwa kakhulu kwiGeomerty ne-Organic Chemistry nayo ebe yinkinga.
“Kuyangijabulisa futhi ukubona othisha bezinikele badela amaholidi bayozicija ukuze babuyele ezikoleni zabo bayotshala ulwazi. Othisha abasebenza ngamaholidi labo esivumelene nabo nezinyunyana bazobhekelelwa njengoba bezohola imali ebalelwa ku-R84 ngehora,” kusho uSishi.
Ukhale nangokuthi nezilimi ziyafundwa ikakhulu isiNgisi njengoba kungesinye sezifundo abafundi abangenzi kahle kuzona.
“Kunabafundi abangu-1 200 abafeyila isiZulu nyakenye okungenye yezinto eyenza kwehle izinga lokuphasa esifundazweni. Izilimi zibaluleke kakhulu yingakho kungenye yezinto esiyibalulile ukuthi ifundwe,” kuqhuba uSishi.
Uthishanhloko waseNdukwenhle, uMnuz Nathi Shandu, uthe banethemba lokuthi bazokwenza kahle kulo nyaka ngoba sebazisusa zonke izithiyo ebeziphazamisa kulesi sikole.
UShandu owaqokelwa ukuba nguNobhala wesifunda uMlazi yinyunyana iSadtu kodwa wakhetha “ukudedelwa” ukuze agxile ekubuyiseni isimo kulesi sikole ukhale ngokugqekezwa nokuhlusulwa kwezicabha namawindi.
Uthishanhloko waseSibusisiwe, uMnuz Sboniso Khomo, uthe kuhlanganyele izikole eziningi okubalwa i-Adams College, Kingsway, Siphingo High, ukuzoncela ulwazi ngokohlelo iKutlwanong lokufundisa ngeMaths neSayensi.
“Abafundi baqala ngoLwesihlanu kuze kube yiSonto bedla iMaths neSayensi ngakho sifuna ukuthi benze kahle kakhulu kulezi zifundo. Sifuna ukuthi bande abaphasa ngamalengiso lezi zifundo,” usho kanje.