UBabes nesiphakamiso kuMasipala weTheku
PHEZU kokuthi kukhona abakhala ngokumoshwa kwemali yabakhokhi bentela ngokwenzelwa abaculi baseThekwini umcimbi wokubavalelisa njengoba beyomela idolobha emiklomelweni eseLos Angeles, e-USA, omunye walaba baculi uthi akukhishwe imali yabazobaphelezela.
Izolo ekuseni uMasipala weTheku ubunesidlo sasekuseni eMoses Mabhida Stadium lapho bekufiselwa khona umculi wegqom’ uBabes Wodumo nomrepha uNasty C ukuthi bahambe kahle.
Bayomela elakuleli kumaBET Awards azoba seMicrosoft Theatre ngoJuni 25.
Iqembu eliphikisayo, iDA libe nokukhala ngalokhu kanjalo nabanye abantu ezinkundleni zokuxhumana.
UBabes Wodumo ekhuluma kulo mcimbi, uthe bajabule, ikakhulukazi ngoba bangabaculi abasafika emculweni.
Uthe okunye okungabajabulisa ukuthi umasipala ubabuze ukuthi yonke into ihamba kahle yini futhi emakhaya kunjani.
“Okwesibili, kungasijabulisa ukuthi uma siya ngale kube khona abantu abasiphelezelayo,” kusho uBabes.
“Uyathanda bakuphelezele angithi?” ebuza uNasty C.
Uthe umasipala kumele ukhiphe imali kube khona abahamba nabo.
INhloko yezokuVakasha eThekwini, uPhillip Sithole, itshele Isolezwe ukuthi umbono muhle kodwa ngeke kwenzeke. “Mhlawumbe ngokuzayo,” kusho uSithole. UBabes uthe ujabule kakhulu. Yize ekusaba ukugibela ibhanoyi kodwa lolu hambo ulubheke ngabomvu. UMampintsha uthe nakanjani uyahamba.
“Ngiyaligibela ibhanoyi uma kuphoqa. Kulokhu kuyaphoqa,” kusho uMampintsha. UNasty C, uthe akazi athini kodwa uma ekhula njengomculi omncane into ayibheke kakhulu wukukhonya emhlabeni jikelele.
Uthe uyajabula ukuthi iTheku liyalibona ithalente lakhe.
IMenenja kaMasipala entsha uSipho Nzuza, ithe ayazi ukuthi malini echithwe ngomcimbi ngoba isanda kufika.
IMeya yeTheku uZandile Gumede igcine ingafikanga kulo mcimbi kuthiwa iphoqeleke ukuthi iphuthume kwenye indawo emhlanganweni. Ibimelwe yiPhini layo uFawzia Peer elithe bayaziqhenya ngalaba baculi.
Uthe uma izinto noma abantu baseThekwini begqamisa le ndawo emhlabeni jikelele lokho kwenza abantu bakhulume ngeTheku.
Abebekhona kulo mcimbi kubalwa kubo uDJ Sox, Madanon, Distruction Boyz, DJ Boonu, Sox, L’vovo, Sphectacula noNaves, DJ Bongz, izikhulu zaseMabala Noise uSquiks Nzuza noThobela Dlamini nabanye.