Sesiqedile neThanda: Usuthu
SIBHEKWE ngesonto elizayo isinqumo sePremier Soccer League (PSL) ngodaba lokudayiselana kwaMaZulu neThanda Royal Zulu isitifiketi sokudlala kwi-Absa Premiership.
Lokhu kuvele ngesikhathi uLunga Sokhela oyisikhulu esiphezulu kuMaZulu exoxa nabezindaba izolo ekuseni ngesikhathi kumenyezelwa amaqembu azodlala kwiPrince Mangosuthu Buthelezi Cup, oLundi ezoba ngoJulayi 30.
Izolo leli phephandaba libike ukuthi konke sekulele kwiPSL ngokudayiselana kwaMaZulu neThanda.
Usuthu luphefumule okokuqala mayelana nokudayiselana neThanda. Kusukela lolu daba lwaqala, iThanda iyona ebihlale ibeka uhlangothi lwayo futhi ingakufihli ukuthi kukhona izingxoxo eziqhubekayo phakathi kwayo nezikhulu zaMaZulu.
“Bekunezingxoxo eziningi ezibe khona phakathi kwezinhlangothi ezahlukene ngendaba yokudayiselana. Kulezi zinhlangothi kubalwa neThanda ephumele obala ngezinhloso zayo zokudayisa iqembu. Sigcine sivumelene neThanda futhi konke sekusezandleni zePSL. Lolu wudaba oluphuthumayo, ngakho silindele isinqumo ngaphambi kokuthi kushaye uLwesithathu oluzayo. Asingabazi ukuthi nakanjani iPSL izolusukumela lolu daba ngoba kumele yenze uhla lwemidlalo. Siyazethemba ukuthi sikufake konke okudingekayo ukuze isicelo sethu siphasiswe,” kusho uSokhela.
“Sisebenze kanzima ukwenza isiqiniseko sokuthi konke sikwenza ngokulandela imithetho. Isigungu esiphezulu sizosebenzisa imithetho uma sesithatha isinqumo. Siyazethemba ukuthi konke kuzohamba kahle.”
Leli phephandaba lisanda kubika ukuthi uSifiso “Jomo” Biyela nguyena ozothatha ubulungu baMaZulu bokudlala kuNFD.
“Uma konke kuhamba kahle isitifiketi sethu (sokudlala kwiNational First Division) sizosigcina eRichards Bay (lapho bekuzinze khona iThanda). Usekhona umuntu esixoxa naye kodwa ngeke ngikwazi ukudalula igama lakhe ngoba lolu daba luseyimfihlo. UPierre (Delvaux ongusihlalo weThanda) usitshelile ukuthi bakhona abantu baseGoli abebefuna ukuthenga iqembu kodwa isicelo sabo besingacacile.
Emasontweni adlule kusabalale izindaba zokuthi AmaZulu azimisele ukukhipha u-R60million ukuze athenge iThanda. USokhela uyichithile eka-R60million.
“Akulona iqiniso ukuthi sizokhipha u-R60million. Imali esizothenga ngayo ayisondele ngisho ukusondela kule okukhulunywa ngayo. Kunomehluko phakathi kokuthenga isitifiketi sokudlala esigabeni esikhulu nokuthenga iqembu. Ngokujwayelekile iqembu elidlala esigabeni esikhulu livamise ukubiza imali ebalelwa ku-R50million,” kusho uSokhela.
Lesi sikhulu siphinde saqinisekisa ukuthi uJoey Antipas nguyena ozocija iqembu esigabeni esikhulu. URonnie Moroka uzoba ngumqeqeshi weleMultichoice Diski Challenge. labo nobhala abaningi kangaka? Ngeke phela wanelise noma ufake wonke umuntu omthandayo ezikhundleni zobuholi, kuzogcina sekushayisana nemibono
kungasebenzeki. Uxolo kancane mshayeli we-ANCYL sesiyafika kuJuni 16, yini osiphathele yona?