Intsha ifuna imisebenzi, hhayi ipolitiki
INTSHA eningi ayiyingeni eyokuzibandakanya nepolitiki kodwa iyafunda ngokwenzekayo ukuze ibe nolwazi.
Njengoba kusasa kuzobe kuwusuku lokukhumbula iqhaza elabanjwa yintsha ka-1976, intsha ekhulume naleli phephandaba ithe izobe izihlalele emakhaya ingayile emigubheni yalolu suku.
UMlungisi Nyathi (25) wasePinetown uthe: “Thina sibhekene nenkinga yokushoda kwamathuba omsebenzi. Bengisebenza nyakenye kodwa inkampani yasitshela ukuthi isimo somnotho sibi kungenzeka ivalwe. Ngakhetha ukusula, ngiyofunda. Umkhakha engiwukhethile we-Architect nawo uncike ekutheni umnotho umi kanjani. Ngiyazihlupha ngokufunda ukuthi kwenzekani kwezepolitiki ukuze ngazi ukuthi kumele ngizihlele kanjani kodwa angilibambi iqhaza kuyo.”
UCawekazi Vellem (24) wase-Eastern Cape owenza iBTech kwiMarkerting eDUT uthe : “Anginayo ngisho ithelevishini ngoba ngifuna ukuzinikela ezifundweni ngingaphazanyiswa lutho. Anginandaba nepolitiki nokuthi kuphethe bani uma nje sizothola imisebenzi kuphelile.”
USanele Mdlalose (25) waseGingindlovu uthe: “Uma ufuna ukuxhaswa ngemali yokufunda abakhipha uxhaso bafuna ukwazi ukuthi ukuyiphi inhlangano yezepolitiki. Noma uyofuna usizo emakhanseleni akubuza ukuthi uyavota yini. Angiboni ukuthi kumele lokho kubuzwe. Kumele abakwipolitiki benze kahle nathi sibabone beyisibonelo esihle bese siyangena.”
UMinenhle Ndwandwe (18) waKwaNongoma uthe: “Ngiyazi ukuthi kwenzekani kwezepolitiki kodwa angifuni ukungena emaqenjini nasemibangweni.”
UNhlonipho Shembe (21) waseNanda uthe: “Ngisewumfundi angiboni ukuthi kumele ngizikhathaze ngokuthi kwenzekani kwezepolititiki. Ngisanake izifundo zami. Mhlawumbe uma sengiqede izifundo zami ngizoshintsha umqondo ngibe nothando lokwazi ukuthi kwenzekani.”
ULondeka Nhasengo (18) waseMpangeni uthe: “Mina ngikholelwa ekutheni imfundo kuqala ipolitiki ngemuva. Nomsebenzi engifuna ukuwenza awudingi ukuthi ngingene ngigxile kwipolitiki, ngingasho nje ukuthi ngiyibukela ngikude.”
UThabo Ntshiliba (24) uthe uyavota uma kuwukhetho kodwa alikho elinye iqhaza alibambile kwezepolitiki. “Uma sekudlule ukhetho angizikhathazi ngokuthi obani abangena ezikhundleni nokuthi kwenzekani kuhulumeni, ngibhekana nezincwadi zami. Isikhathi enginaso esokufunda kuphela hhayi esokucubungula okwenzekayo ngasohlangothini lwezepolitiki.”
USifiso Majola (24) wasePort Shepstone uthe akanandaba nokuthi ipolitiki ilishintsha kanjani izwe. “Kimina kuyazifanela nje abakwipolitiki bangenza noma yini abayithandayo akuthi diki kimina,” kusho uSifiso.