Ngizwelana nemindeni yabamukile
MHLELI: Ngibhala nje inhliziyo yami inokukhulu ukukhathazeka nokuzwa ubuhlungu obuhambelana nokuzwelana nemindeni eshiywa yizihlobo zayo ngokumuka nemifula. Kubuhlungu kabi ukuthi umuntu ahambe ngalesi simo ngoba kushiya umndeni uhlukumezekile.
Akusizi-ke ukwanda ngemilomo njengeziqabetho ezikhulwini zikahulumeni kuwona wonke amazinga kepha zihudule izinyawo uma sekumele kwenziwe okuthile ukugwema ukufa kwabantu ngokuminza. Indaba yamabhuloho emifuleni yasemakhaya kumele ithathwe njengento ephuthumayo. Abantu baze banqume ukungena emfuleni nje yingoba isuke ingekho enye indlela. Lapha ngakithi nje ku-ward 23 eMlalazi sisenkingeni enkulu ikakhulu oHhahheni ngaseNduneni uNene.
Kule ndawo izikole nezitolo nemitholampilo kungaphesheya komfula uMhlathuzana. Lo mfula uma usugcwele izingane aziyi esikoleni, abasebenzi abayi emsebenzini angisayiphathi-ke uma kunesimo esiphuthumayo kumele umuntu aphuthunyiswe emtholampilo angafela endlini.
Yikho-ke ngithi ezinhlelweni zikahulumeni kumele ibekwe eqhulwini indaba yamabhuloho. Ngeke sikubekezele ukuhlala engcupheni enje. Awucabange nje ingane uma ingadla into ebulalayo ngephutha sekumele iye emtholampilo uthole ukuthi umfula ugcwele, uyoyibuka ifele endlini ngoba ayikho indlela yokuwela.
Siyocela uma amakhansela ebika ngalezi zindawo angazitshwa ngoba basazoqhubeka nokufa abantu uma kungasukunywa ngokushesha. Ngiyothokoza uma lo mbono uyobhekwa ngeso elibanzi. Abantu abangakhunjulwa ngoba sekumele beyovota kepha azibhekisiswe ngokushesha izidingongqangi zabo. Skhumbuzo Mnelisi Hlongwane OHHAHHENI omusha.
Sekuwuye kuphela la eNingizimu Afrika ongaqeqesha leli qembu laseNaturena. Njengephephandaba ngiyanicela ningicelele yena uMngqithi ayofaka iCV ePhefeni.
Ngicela lokhu nje ngoba leli qembu kuyabonakala ukuthi seliphelelwe wushatini. Ngeke ngisachaza okuningi ngeqembu lami, wonke umuntu uyazi ubunzima elibhekene nabo. Qaphelani, wumbono wami lo, angibatsheli. Siyatemba Tyatha EST GEORGES, ETHEKWINI