Imbokodo ingase ikuphinde lokho kuma-Idols
UBABAZA ithalente nokuzimisela kwabesifazane abazobonakala kulo nyaka kuma-Idols SA, uphrojusa nomqondisi walolu hlelo, uGavin Wratten oselokhu alubamba zisuka ngesizini yokuqala. NgoJulayi 9, ngo-5.30, kuMzansi Magic (channel 161), kuzoqala isizini ka-13 yohlelo ama-Idols Ngonyaka odlule intokazi yaseMgungundlovu, uNoma Khumalo yakhala yemuka nesicoco. UGavin enkulumeni abe nayo neSolezwe, uthe kuzoba kancane nakulo nyaka isicoco singahambi nomuntu wesifazane. “Konke sekumi ngomumo njengoba sesiqedile ngomsebenzi wokuqopha iziqephu zokuqala. Sekusele singene ezinhlelweni ezikhonjiswa bukhoma. Kodwa ngingasho ngingananazi ukuthi nakanjani ithalente liyamangalisa SA. kakhulu kuzona zonke izifundazwe esizihambele,” kusho uGavin. Uthe kulo nyaka kukhona okuningi okushintshile obekungabonakali kumasizini adlule. “Kulo nyaka sinamajaji amathathu kuphela kodwa ngesikhathi sisahambela amadolobha ahlukene sicele osaziwayo ukuthi basisize ekuthungatheni ithalente,” kuchaza uGavin. Uthe uma sekuqala uhlelo bazosebenzisa amajaji amathathu kuphela okunguSomizi Mhlongo, Unathi Msengana noRandall Abrahams. “Sizoba nomeluleki ozosiza abangenele uhlelo ngokubachushisa ngezinto ezahlukene emculweni. Ngesikhathi senhlolokhono kuzophinde kubonakale amajaji esebenzisa elinye ithikithi elitholwa ijaji ngalinye ukunika lowo okubonakala ekulungele ukuba kulolu hlelo,” kuchaza uGavin. Uthe nabazobonakala esigabeni seWooden Mic kulo nyaka bazoshiya ababukeli bama-Idols, befa insini. “Uyazi abantu abasuke bevela esigabeni seWooden Mic, ngeke ukholwe ukuthi basuke bezitshela ukuthi bayakwazi ukucula kodwa nathi singabaphoxi sibanike ithuba bese siyabona ukuthi akukho esingamsiza ngakho kodwa ukumfaka kwiWooden Mic,” kusho uGavin. Uthe nakulo nyaka sebebakhethile abantu abangu-40, abazobonakala kulesi sigaba.