Ziyakhithizwa ezakwaRenault
BENEME ngendlela izimoto zabo ezincane ezidayisa ngayo kwaRenault South Africa.
Izimoto abazishaya isifuba ngokuthengwa kwazo yiRenault Kwid neSandero. Muva nje basanda kudalula ukuthi sebedayise amaSandero angaphezulu kuka-2000 kanti iKwid ingaphezulu kuka-1 928.
ISandero entsha inezinhlobo ezintathu kodwa kulokhu kukhona umehluko. Kukhona iSandero Expression etholakala nezinto ezincane, kulandele iStepway Expression entsha engene esikhaleni seSandero Dynamique, neyokugcina iStepway Dynamique.
Ukungathengwa kahle kweSandero Dynamique yikhona okwenze kwandiswa iStepway.
Ishintshwe izinto ezincane ngaphandle nangaphakathi.
Ngaphandle inamalambu amasha ngaphambili anamaDaytime Running Lights angamaLED amise okukaC njengakuzo zonke izimoto ezintsha zakwaRenault, inobhampa omusha kanjalo namalambu amasha nangemuva. Inamasondo angu-15 inch.
IStepway ithe ukuphakama futhi ine-spoiler ngemuva, roof bars nama-fog lights ngaphambili.
Inyathela ngamasondo anamarimu angu-16 inch.
Ngaphakathi ine-centre console entsha. Izinkinobho zokunyusa amawindi kagesi azisekho phakathi nendawo kodwa sezisezicabheni futhi ne-hooter isisesiteringini.
IStepway Dynamique, ebengihamba ngayo inamaairbag, amawindi kagesi ngaphambili nangemuva kodwa umshayeli akakwazi ukulawula awangemuva, park assist ekusiza uma uhlehla, cruise control neRenault MediaNav eyi-touchscreen engu-7 inch ekhombisa inkombandlela nokunye. Ikwazi ukuxhuma iBluetooth ne-USB iphinde idlale namaCD. Inendawo yokuphumuza ingalo yomshayeli.
Inezihlalo zesikhumba ezintofontofo. Ibhuthi ingu-292 litres. Awukho umehluko wenjini ngoba inengu-0.9 litre Turbo kaphethroli. Inamandla angu66kW ne-torque engu-135Nm.
Njengoba kuyimoto yokuhamba kakhulu edolobheni, kungaba kuhle kube negiya elizishintshayo.
Ngebanga lika-100km bathi isebenzisa amalitha angu5.2 kaphethroli. Inebhathini le-ECO elisizayo ukuze yonge. Ngakwezokuphepha ifika namabhuleki e-ABS, EBA ne-ESP neHill Start Assist.
Ngicabanga ukuthi abantu abathenga iSandero abalenzi iphutha ngoba isibukeka kangcono, iphephile futhi inezinto eziningi ephuma nazo ngenani layo elikahle. AMANANI New Renault Sandero Expression R159 900 (incl. VAT)
New Renault Stepway Expression R174 900 (incl. VAT)
New Renault Stepway Dynamique R189 900 (incl. VAT)
Iphuma ne-warranty yeminyaka emihlanu noma ngo-150 000 km, ne-service plan yeminyaka emibili noma ibanga lika-30 000km.