Kuboshwe ‘obulale’ ingane yentombi
UZINIKELE emaphoyiseni izolo owesilisa waseSavage, eMlaba Village, eHammarsdale ozivumela yena ukuthi ubulele indodakazi yakhe angayizali eneminyaka emibili okusolwa ukuthi uyishayile, wayigqiba ethuneni elingashoni ehlathini eliseduze nedamu.
Indoda eneminyaka engu-32 izolo ihambe namaphoyisa iyokhomba lapho igqibe khona ingane, kwambiwa, isidumbu sayo satholakala.
Kuthiwa umsolwa uvuke ekuseni izolo wayotshela umngani wakhe ukuthi nguyena obulele ingane wayigqiba ehlathini. Umngani umeluleke ngokuthi akazinikele emaphoyiseni wakwenza lokho ngemuva kokuphika izinsuku ezintathu ethi akayazi.
Isolezwe lithole ukuthi utshele umngani wakhe ukuthi weqise isandla ngesikhathi eyishaya yashona.
Kuthiwa ubikele umphakathi ngoLwesine olwedlule ukuthi udukelwe yingane waze wahamba wayobikela amaphoyisa. Umphakathi ube usuphuma inqina uyithungatha wangayithola.
Unina wengane izolo usinde ngokulambisa umphakathi ufuna ukumudla luhlaza ngoba ubelokhu evikela umsolwa ethi akasoze abulala ingane yakhe. Kuthiwa ubesamvikela yize esezinikele emaphoyiseni. Elinye ilungu lomphakathi elikhulume neSolezwe kodwa lacela ukungadalulwa lithe baqale ukusola ukuthi ngumsolwa obulele ingane ngoba ubebatshela izimpendulo ezishayisanayo.
“NgoLwesine wathi akayazi ingane inyamalele, yena ubebhizi egeza izitsha. NgoLwesihlanu ubuye wathi kukhona imoto eke yama eduze kwesango lakwakhe asola ukuthi iyona entshontshe ingane,” kusho ilungu lomphakathi.
Lithe nasemaphoyiseni ubesho izitatimende ezishayisanayo. Kuthiwa uqale watshela amaphoyisa ukuthi uneminyaka engu-32, wabuye wathi uno-52.
“Likhona elinye ilungu lomphakathi elambona ephethe ibhadeke ngoLwesine wafika wahlala phezu kwalo waphuza ubhiya wabuye wanyamalala kusanda kudlula isikhashana ekade ebike ukuthi ulahlekelwe yingane,” kuqhuba ilungu lomphakathi.
Umphakathi usola ukuthi ingane ubeyifake kulelo bhakede ngesikhathi eyoyigqiba ehlathini.
Okhulumela amaphoyisa KwaZulu-Natal, uColonel Thembeka Mbhele, izolo uthe umsolwa oneminyaka engu-32 uzinikele emaphoyiseni wafike wazivumela ukuthi nguyena obulele indodakazi yakhe.
Uthe uhambe namaphoyisa eyokhomba lapho eyigqibe khona ingane yatholakala ethuneni elingashoni.
“Ubekwe icala lokubulala, kulindeleke ukuthi avele enkantolo maduze,” kusho uColonel Mbhele.