Iningi labafundi abachibiyelayo kabayanga ukobhala
ININGI labafundi abelizobhala izivivinyo zokuchibiyela umatric azilubhadanga ezikhungweni obekumele zibhale kuzo kwathi kulabo abafikile kwaphasa ingcosana.
Ngokombiko wakamuva okhuluma ngabafundi ebebebhala i-National Senior Certificate ohlelweni i-ANA olwethulelwe yikomiti lemfundo eyisisekelo, umnyango uveze ukuthi bawu-124 148 abafundi abebebhalisele ukubhala izivivinyo zokuchibiyela kulo nyaka kodwa bawu- 76 760 ababhalile okusho ukuthi u-38% wabo awuzange ufike ezikhungweni.
Ngemuva kokubhalwa kwezivivinyo zokuphela konyaka nyakenye umnyango wamemezela ukuthi izinga lokuphasa kwabafundi selenyukele ku-72.5% lisuka ku70.7% wangonyaka owandulelwa owedlule.
Kubafundi abawu-76 760 ababhale izivivinyo zokuchibiyela zango-2017, isibalo sabafundi abaphasile senyuke ngabawu-13 765.
Lokhu kusenyuse kancane isibalo sabafundi abathole izitifiketi zika-matric, izibalo zakamuva zikhomba ukuthi ngenxa ka2% wabaphasile izibalo sezikhomba ukuthi bawu-74.5% abafundi abaphase u-matric wanyakenye.
KwaZulu-Natal bawu-22 673 abafundi ababhalile kwabawu-36 387 abebebhalise. Ngokwalezi zibalo u-37.7% awuzange ubhale.
Kulesi sifundazwe, senyuke ngabafundi abawu3 257 isibalo sabafundi abaphasile ngemuva kwezivivinyo zokuchibiyela. Izibalo zenyuse izibalo sesifundazwe ngo-1.5%. Isibalo esisha sesifundazwe sabafundi abaphase u-matric nyakenye sesiwu-67.9% sisuka ku- 66.4%.
Umnyango uchaze isinyathelo sokuvumela abafundi ukuthi babhale izivivinyo zokuchibiyela phakathi kukaFebhuwari noMashi njengemizamo yokunika ithuba lesibili labo bafundi ebebengazange bayithole iNSC kodwa bebe beshoda ngesifundo esisodwa kuya kwezintathu.
Embikweni kuphinde kubalulwe ukuthi bekugcinwa ukuvulwa kwaleli thuba lokuthi abafundi babhale izivivinyo zokuchibiyela . Kuthiwa sekuzobhalwa ngoJuni.