Usehlale amasonto amathathu elolini lakhe elifele emgwaqweni
UKHALA ngosizi umkhulu oneminyaka engu80 osehlale amasonto amathathu elolini lakhe elifile engalutholi usizo ngasenxanxatheleni yezitolo iPhilani, eMlaza.
UMnuz Ndoda Cele waseZinqoleni uthi ufelwe yiloli lakhe emgwaqweni uSbu Magwanyane ngesikhathi eya eSiphingo eyolikhanda.
Iloli lilimale injini ngesikhathi likhuphuka emgwaqweni lagcina lizimele.
Ngokusho kukaCele akekho omsizayo njengoba esenamasonto amathathu ehlala kulona enzela ukuthi lingantshontshwa.
“Angikwazi ukuhamba ngishiye iloli lami lapha, ngicele amaphoyisa ukuba angisize ngilidonse kodwa akekho ongisizayo. Sengikhethe ukuhlala kulona ngize ngithole usizo,” kusho uCele.
Ngobusuku bokuqala kufe iloli lakhe uthe kufike amaphoyisa athembisa ukumfunela imoto edonsa izimoto ezifile.
“Amaphoyisa ayefake imifaniswano angibuza ukuthi nginamalini ngawatshela ukuthi ngino-R8000 engangiwubekele ukuthi ngizokhanda ngawo iloli. Afuna ukuyibona imali ngawakhombisa. Ahamba athi ayabuya nosizo. Ebusuku sengilele kwafika abafana ababili bafuna u-R8000 ngathi anginawo bathi bayazi ukuthi ukhona bawuthatha,” kusho uCele.
Uthe akasenayo imali yokukhokhela imoto edonsa ezifile ngoba ubesalinde ukuba iloli lakhe lithole umsebenzi bese eba nemali.
Uthe iloli lakhe walithenga ngo-2014 ngemali elinganiselwa ku-R200 000.
UCele uyazisebenza njengoba ethe unamanye amaloli amathathu kodwa asahambe nabashayeli futhi nemali yawo uzoyithola uma eseqede imisebenzi ayenzayo.
“Ekhaya nginamadodakazi amahlanu angakwazi ukungisiza, unkosikazi wami washona kanti ngiwumuntu othanda ukuziphilela ngayedwana,” kusho uCele.
Ngesikhathi ekhuluma neSolezwe bekubonakala izitsha zokudla nezinye izimpahla elolini athe zilethwa abaseduze nomgwaqo zinokudla.
NgeSonto ekuseni kuneveni elishayise iloli lakhe ngemuva athe abantu abebehamba ngalo bebephethe amabhodlela bonke kukhona abakuphuzayo.
“Oyedwa kwabebehamba ngaleyo moto uphume wangikhipha elolini lami wangishaya engibuza ukuthi ngimeleni emgwaqweni. Ngizikhalele sengilele phansi waze wangiyeka. Ngilimele esiphongweni,” kusho uCele.
Uthe ngeke abavulele icala abamphuce imali nabamshayile ngoba usabela ukuphepha kwakhe elolini.
UCele uthe akanazo izinombolo zamalungu omndeni wakhe ngoba unefoni entsha.
Isolezwe lifike kune-sticker esifakwe kuleli loli esibhalwe ukuthi: Police Aware (amaphoyisa ayazi)
Okhulumela amaphoyisa KwaZulu-Natal, uColonel Thembeka Mbhele uthe bayalwazi udaba lukaCele kodwa bamxhumanisa namaphoyisa akwaMetro ngoba ibimi emgwaqweni.
Uthe abasazi i-sticker esifakwe elolini.