Izolimala iVuma FM ngokuhamba kwabanohlonze
MHLELI: Kwesinye isikhathi singabalaleli siyaye sicabange ukuthi ukufika komunye umsakazo kuzofaka umsakazo thizeni ingcindezi. Yebo kusuke kunjalo kodwa ngenxa yokungabi nalwazi kwabaphathi kuyaye kungabi njalo. Bona bacabanga ukuthi abasakazi abanamagama abafaka ingcindezi.
Umsakazo iVuma FM ngumsakazo obunekusasa eliqhakazile ngokubuka kwethu balaleli. Lokhu besikushiso wukuthi uma ingase igcine abasakazi bayo ebigadla ngabo noma ibalole ndawana thizeni bekuyokhalwa kwamakhelwane. Okungimangaze kwiVuma FM wukukhonjwa indlela kwabasakazi ebesibabona beyikusasa lomsakazo okungoSkhumbuzo “Skhuu” Mkhize, Thabo “Lwandle” Mzimela, Dumi “BEE” Buthelezi, Sandile “The Master Of Sports” Mchunu nabanye.
Engibabalile bebenentshisekelo yokukhulisa abalaleli. Okwangikhalisa kakhulu wukuhamba kukaSkhumbuzo kwafakwa uGabriel Sithole ezinhlelweni zezemidlalo. Uma ubheka uSithole uqhamuka kwamakhelwane kwiGagasi FM angalenzelanga lutho kwezemidlalo futhi wayezishayela udaka kwi-Extra Time yakhona.
Angehluleli lana kodwa ngisho izinkomba zazisho ukuthi uSithole umehlulile umsebenzi kwiGagasi.
Mina engikwaziyo wukuthi uma umqeqeshi efuna ukuqinisa iqembu lakhe ulanda ukhilimu womdlali ozoza noshintsho eqenjini. Yiluphi ushintsho oluzofakwa uSithole kwiVuma? Yize iVuma ibukeka inganakile ngokushiywa abanohlonze kodwa izolimala kakhulu.
Ukuhamba kukaMthunzi Xulu kuyizimpawu zokuthi izikhulu zakhona azibanakile abasakazi kepha zibukeka zinake inzuzo. Izovela kanjani inzuzo uma niletha abasakazi abayizahluleki. Yize zinganakile izikhulu zeVuma FM ngokuhamba kukaMsizi Shembe obewuphusha umsebenzi eletha abalaleli kodwa izolimala iVuma njengoba uMsizi esekwiMetro FM. Kuyacaca ukuthi kunesimo esiholele ekutheni abasakazi badikibale ngenxa yezikhulu. Kodwa ngasho ngathi bazoyizwa indaba ngokuletha izikhulu ezaziphethe kwiGagasi. Manje sezizoshiya kukhalwa kwiVuma. Kuyacaca ukuthi iVuma ngeke iye ndawo uma isazodedela abasakazi abamnkatshubomvu. Kulungile ngoba sithi isisho ohlabeyakhe akaphikiswa. Khabela Mzimela EZWELIBOMVU