UFana umanqikanqika
USIDLELA amathambo engqondo isinqumo sokuyeka isibhakela owayengumpetha we-International Boxing Federation (IBF) lightweight, uMzonke “The Rose of Khayelitsha” Fana, ophinde wahlulwa ngempelasonto edlule.
UFana (43) ulahlekelwe yibhande le-SA lightweight ehlulwa ngamaphuzu nguThompson Mokwana (osesithombeni) empini ebikade iseTurfontein Race Course, eGauteng, ngoLwesihlanu. Izimpi bezikade zihlelwe ngu-Ayanda Matiti weXaba Promotions. Bekungokwesine uFana ehlulwa ezimpini zilandelana.
Useguqe kubashayisibhakela okukhona kubona uTerry Flanagan wase-United Kingdom empini yebhande le-World Boxing Organisation (WBO) lightweight noHowik Bebraham waseGermany.
Nyakenye iNingizimu Afrika ibambe umoya ngesikhathi uFana equleka emuva kwempi yebhande le-International Boxing Organisation (IBO) lightweight
no-Emmanuel Tangoe eBukom. Emuva kwale mpi watshela Isolezwe ukuthi akakayicabangi eyokuyeka isibhakela, wathi akabashayi mkhuba abathi akashiye kulo mdlalo ngenxa yeminyaka yakhe.
Izolo uthe: “Sengiyakucabanga ukusiyeka isibhakela. Ngeke ngisho ukuthi le mpi bekungeyokugcina noma ngisazoqhubeka. Kodwa ukuyeka isibhakela ngiyakucbanga manje ngenxa yeminyaka yami. Kuseva ukuthi ngingathatha isinqumo ngoba impi isanda kudlula.
Kungenzeka kube eyokugcina, kungenzeka ngiphindele eringini futhi. Sekunesikhathi unkosikazi wami efuna ngiyeke. Ngizokhuluma naye, ngaphambi kokuthatha isinqumo.”
Ukhuluma kanjena nje uFana, uMokwana ungene eringini eseshilo ukuthi uzicelele ukulwa nale ngqwele ngaphambi kokuthi iphanyeke amagilavu emgibeni kwazise ufuna ukuwinela ibhande indodana yakhe uThato owathi ezalwa ngo-2014 lamphunyuka. UMokwana, owayephethe ibhande le-IBO, waliphucwa nguXolisani “Nomeva” Ndongeni.
““Ngazicelela kuFana ukuthi anginike impi ngoba ngizwa kuthiwa usezothatha umhlalaphansi esibhakeleni.
“Wangiphendula ngokushesha ethi uzongishaya kodwa ngaqhubeka ngamcela ukuthi azame ukuyihlanganisa le mpi.
“Ezinyangeni ezedlule ihlehle sekusele izinsuku ezimbili singene eringini nokuyinto eyangiphatha kabi kakhulu,” kusho uMokwana.
“Ngalwa noNdongeni ngingafuni, ngizibona ukuthi angikakulungeli ukulwa naye ikakhulukazi ngakubo. Kodwa kwesinye isikhathi abaqeqeshi basuke bezijahele imali.”