Angiyi ndawo noma kunjani: Zuma
UMENGAMELI Jacob Zuma utshele amaqembu aphikisayo ePhalamende ukuthi akayi ndawo ngisho kungathiwa amalungu e-ANC awavote ngokuyimfihlo.
Ephendula imibuzo yamalungu ePhalamende, utshele umholi we-DA, uMnuz Mmusi Maimane, ukuthi unguMengameli owakhethwa ngabantu baseNingizimu Afrika futhi ngeke akhishwe ngamaqembu aphikisayo.
“Ngikufanele ukuba nguMengameli wezwe futhi ngiwenza kahle umsebenzi wami. Ngabekwa yi-ANC, inhlangano evotelwa ngabantu baseNingizimu Afrika. Uma i-ANC icabanga ukuthi angifanele ukuba nguMengameli izongikhipha, okwamanje ayikakwenzi lokho,” kusho uZuma.
Uthe usebhekene namavoti ayisikhombisa amaqembu aphikisayo ethi awasabuthembi ubuholi bakhe. Ngisho amaqembu aphikisayo angahamba aye enkantolo yoMthethosisekelo ayofuna ukuthi kuvunywe ukuthi amalungu ePhalamende avote ngokuyimfihlo ngeke aphumelele.
Inkantolo ithe isinqumo sokuthi amalungu ePhalamende angavota ngokuyimfihlo sisezandleni zikaSomlomo wePhalamende, uNksz Baleka Mbete.
“Asikho isidingo sokuthi kuvotwe ngokuyimfihlo ngoba sihlale sivota esidlangalaleni. Nizama ukuthola abantu abaningi ukuthi bahambisane nani, ngebhadi aninabo abantu,” kusho uZuma ebhuqa amaqembu aphikisayo.
Uthe i-ANC izobabuyisa omasipala abayilahlekele okhethweni lwanyakenye futhi izonqoba ukhetho lukazwelonke ngo-2019 ngoba abantu bazoyivotela ngobuningi babo babone ukuthi benza iphutha ngokuvotela i-DA.
UZuma akawuphendulanga umbuzo kaMnuz Willie Madisha oyilungu le-Congress of the People (Cope) obefuna ukwazi ukuthi ngabe sizolalelwa yini isicelo senhlangano yamabandla i-SA Council of Churches sokuthi kukhethwe uhulumeni omusha ngoba lona okhona usulahlekelwe yisimilo.
UZuma uthe uma kukhona abathi uhulumeni ulahlekelwe yisimilo akusho ukuthi lowo ngumbono wabo bonke abantu baseNingizimu Afrika ngoba kusukela ngo-1994 i-ANC ivotelwa ngabantu abaningi .
“Lokhu okushiwo nguMnuz Madisha kungumbono wabantu abaphikisana nohulumeni njengaye nje. Akusibo bonke abantu abacabanga ukuthi uhulumeni ulahlekelwe yisimilo,” kusho uZuma.
Mayelana namabhizinisi endodana yakhe nokuncikana nayo nomndeni wakwa-Gupta, uZuma uthe akufanele indodana yakhe ijeziswe ngoba izalwa nguMengameli kodwa kufanele iqhubeke nomsebenzi wayo njengabo bonke osomabhizinisi.
Uthe ukubhalwa kwezindaba ezithinta umndeni wakwaGupta nokusebenzisana kwawo nohulumeni kusho ukuthi izwe likhululekile ngoba izinto ezinjena azibhalwa kwamanye amazwe.