‘Yimina engafika noMaimane kwiDA ngimbelethe emhlane’
UVOLOS njengomagcino ezinganeni zakwaGupta ukhathazekile ngokuthi sekungumkhuba ojwayelekile ukuthi kusolwe umndeni wakwaGupta uma kunezingxabano emaqenjini ezepolitiki. Sikhuluma nje izinto zimapeketwane ku-ANC kukhalwa ngokuthi wumndeni wakwaGupta ofake unyawo lwedada ngokuqwengula imiqondo yabaholi abathile. Namanje njengoba kunengxabano phakathi kukaHelen Zille noMmusi Maimane weDA ngisola ukuthi kuzogcina kuthiwe baqhathwe ngabakwaGupta. OkaVolos uxoxe nomama uZille efuna ukuthola ukuthi uzizwa enjani ngalesi sinqumo sokumiswa kwakhe ezinhlakeni zeDA.
Volos: Nxese MaZille ngiyazi kubuhlungu futhi akwemukeleki okwenziwa nguMaimane kuwena.
Zille: Ngiyabonga Volos, kubuhlungu kuyaqaqamba kodwa ngiyethemba kuzokwedlula ngoba nobandlululo lwagcina luphelile.
Volos: Ngubani nje owayengacabanga ukuthi ungathi uzibumbele uMaimane wakho, athi uma esekhulile akujikele akumise ezinhlakeni zeqembu owamhehela kulo.
Zille: Nami angikaze ngiphuphe ukuthi uMaimane angahlangana nezitha zami athi anginqanyulezwe.
Volos: Kunesisho sesiZulu esithi umbeki wenkosi akabusi nayo, kungabe sekufakazeleka khona yini naseqenjini iDA?
Zille: Indlela okwenzeka ngayo kukhomba ukuthi kunetulo lokuthi ngishaywe ngesithende ngoba sengibukeka ngiyisiphazamiso.
Volos: Ngabe ikhona yini ingxabano esingayazi ephakathi kwakho noMaimane?
Zille: UMaimane ngimthathisa okwendodana yami engiyikhulise kanzima, angikaze ngizicabange ngixabana naye kodwa ngingeze ngamkhulumela ngoba isidalwa esingumuntu siyincwadi engafundeki.
Volos: Loyo owabe engumholi weDA, uTony Leon, ukuchaze njengomuntu oyisiphazamiso ekuholweni kweDA. Enkulumeni yakhe uthe yena akazange akuphazamise ngesikhathi ekushiyela isikhundla kodwa wena ubukeka ugxambukela uphazamisa uMaimane.
Zille: Kangiqondi ukuthi uwathatha kuphi lamawongowongo akhuluma ngawo uLeon ngoba yimina engafika noMaimane ngimbelethe emhlane ngimlethe kuDA. Kungenzeka kanjani ukuthi ngizakhele umuntu wami, kuphinde kube yimi engimliswayo ngimenze isahluleki?
Volos: Kunemibiko yokuthi njengoba umisiwe ukhala ngokuthi uyahlukunyezwa ngoba umhlophe, kungabe uchaza ukuthini ngalokho?
Zille: Ngichaza ukuthi ukube ngimnyama ngabe angimisiwe ngoba akhona amalungu eDA amnyama enza izinto eziphambene kodwa awamiswa.
Volos: Uchaza ukuthi uMaimane unobandlululo?
Zille: Angisho njalo kodwa kucace bha ukuthi izinto zenziwa ngetiye elivuna abathile.
Volos: Ungaphawula uthini ngoMalema osekusole ngokuthi ubulala iDA njengoZuma obulala i-ANC.
Zille: UMalema uyabheda uma engiqhathanisa noZuma ngoba mina naye siyimpumalanga nentshonalanga. UZuma uyaziwa ukuthi ungumuntu wamahlazo mina ngisolwa ngokuthi ngancoma imisebenzi yobandlululo.
Volos: Ezinkundleni zokuxhumana sekunabalandeli beDA abathi uMaimane akahambe ajoyine i-ANC ngoba ulwa nawe.
Zille: Ngicela ukungaphawuli ngamahemuhemu, engingakusho wukuthi mina ngisakholelwa ebuholini bukaMaimane.
Volos: Ngabe akhona yini amakhempu abamhlophe nabamnyama kuDA?
Zille: Ngokwazi kwami besingakabi nawo amakhempu, imikhuba yamakhempu ngeyeANC ngoba ihambisana nomfelandawonye onemibono eyehlukene.
Volos: Awunazo yini izinsolo zokuthi le ngxabano yeDA ibhebhezelwa yisandla semfene esingamaGupta?
Zille: Anginalo ulwazi kodwa angisoze ngaphika ngoba amaGupta awabonakali uma engena, niwabona esegcwele indlu esehlezi emsamo enilawula.
Volos: Ungenzenjani uma ungathola isimemo siqhamuka kuZuma ethi ucela nihlangane ukuze niduduzane ngoba nobabili niyahlukunyezwa emaqenjini eniwaholayo?
Zille: Kangisoze ngakuvuma lokho ngoba utwayi oluhlasele uZuma ku-ANC alufani notwayi lwami olungikhungethe kuDA.