Intsha mayingalindeli ukuthi iyoze ifunzwe
MHLELI: Njengamanje siphila esikhathini senkululeko futhi esiphucukile ngenxa yobuchwepheshe osebusetshenziswa ezweni obunye babo obenziwa yintsha.
Siyisizukulwane esisenhlanhleni ngokwezinga lempilo esikuyo kodwa thina asikuboni lokho njengoba abanye bethu becwile ezidakamizweni ezehlukahlukene babuye benze nezinye izinto ezingasiyisi phambili singabantu abasha. Kukude lapho kusukwa khona futhi kukhona abafowethu nodadewethu bango-1976 abadela impilo yabo ukuze sibe nekusasa elinjengaleli esesinalo namhlanje.
Njengamanje sekuyisikhathi sokuthi sizibheke thina ukuthi sihloseni ngempilo yethu ngoba abazali bethu basebenze kanzima ukuthi babeke ukudla phambi kwethu kodwa abanye basalindele ukuthi bafunzwe. Ngikusho lokhu nje yingoba ziningi izingane eziyiswe esikoleni ukuthi ziyothola imfundo kodwa azizange zikunake lokho zashona ezintweni ezingalungile nezidicilela ikusasa lazo phansi.
Njengamanje inselelo esibhekene nayo wukuthi sikhumbule indima eyaqathwa yintsha ka-1976 ngokuthi thina sizakhele igama ngemfundo nemisebenzi ebonakalayo, sigqugquzelane ngezinhlelo esizikhandela zona futhi siphinde sinxuse uhulumeni naye ukuba asihlangabeze endleleni. Singahlali nje bese sibheka ukuthi kumele senzelwe izinto. Khona sibonile izinto zenzeka kodwa wena uwedwa uye uzibuze muphi umbuzo ngempilo, ikusasa lakho nelezwe ophila kulo. Wena yiliphi igalelo ofisa ukunconywa ngalo noma ukukhunjulwa ngalo.
Kumele sibhukule sakhe owethu umsizilo esothi uma singasekho kuthiwe sashiya senze lokhu. Kuyihlazo elikhuluke nelisilandelayo ukuthi njengamanje abanye bethu babonakala beyizahluleki ngoba bengafuni ukusebenzisa ubuchopho nezandla zabo kodwa bafuna ukuthi bakhale ngabanye abantu ukuthi bayababukela nje. Lesi akusona isikhathi sokuthi sihlale silindele ukuthi sizophakelwani. Kodwa yithi okumele sizikhandele izinto ezizoba ngukudla kwethu nokwabezayo.
Njengoba kuthiwa thina siyizigqila zezidakamizwa yingoba vele yithi esikuvumelayo lokho sigijimela izinto eziphezulu. Uyazi iningi labantu noma izingane ezigxile ezidakamizweni ngabantu abavela emakhaya afudumele. Abanye babalekela ukutshelwa neziyalo bese bezibona bengompetha bashiye emakhaya.
Yize kungebona bonke abanye inhlalo esuke ingeyinhle kodwa ziningi izindawo ezisungulwe ukugcina abantu abangenawo amakhaya nabantu abalahlwe yimindeni yabo. Lapho kusuke kunabantu abazibophezele ngokuthi banikele ngezinto ezizosiza ukuthi labo basuke begcinwe kulezo zindawo basizakale.
Kodwa nina ngoba ningamaqili azikhotha emhlane niyahamba niyohlala emgwaqweni lapho enizohlangana khona nabo bonke abantu abazonifaka emikhubeni emibi.
Sengiphetha nje thina simelwe wukuhlakulela isizukulwane esizayo indima eyalinywa yintsha ka-1976. Ngiyanxusa ukuthi njengoba kuyile nyanga nje kulo nyaka uke uzibuze muntu omusha ukuthi wena ufisa ukuthi isizukulwane esizayo sificeni lapho wena obukade ukhona, yini ozosishiyela yona ukuba siqhubekele kuyona.
Njengoba wena unelungelo lemfundo ongayithola ngisho nangolimi lwakho ngenxa yokuzabalaza kwentsha ka-1976, uthi isizukulwane esizayo sizothini ngawe? Nelisiwe Cele ENANDA