OweSibaya kowokuklomelisa abamatekisi
KUZOKHULEKELWA ukuthula nezingozi zomgwaqo emcimbini wokuklomelisa abashayeli bamatekisi abaphatha kahle abagibeli nabalandela nemithetho yomgwaqo emcimbini kasoseshini wamatekisi aseHammarsdale, ozoba seMpumalanga Stadium, ngeSonto.
Kulo mcimbi ohlelwa yiNelli M Foundation kuzofika umlingisi weSibaya, uBheki Mkhwane olingisa indawo kaNdlovu ongumnikazi wamatekisi kulo mdlalo.
UNksz Nellie Mkhize ohlela umcimbi uthe iMpumalanga Taxi Association ibone kungcono ukuthi kwenziwe umkhuleko wokuthula kukhulekelwe nokuthi kwehle izingozi bese kugqugquzelwa abashayeli abaziphethe kahle ngokuthi banikwe imiklomelo ehlukahlukene.
Kuzobe kukhona noNgqongqoshe wezokuThutha KwaZulu-Natal, uMnuz Mxolisi Kaunda, izikhulu zikasoseshini waseMpumalanga namalungu omphakathi.
“Kubalulekile ukuthi osomatekisi bahalaliselwe uma benza kahle. Usoseshini waseMpumalanga ukuthandile ukuthi kukhulekwe futhi kuhalaliselwe abashayeli abaziphethe kahle no-rank manager abawenza kahle umsebenzi wabo. Kuzobe kukhona uNdlovu weSibaya ezogqugquzela osomatekisi ukuthi bawenze kahle umsebenzi wabo. Kuzoklonyeliswa abashayeli abathathu abalandela imithetho yomgwaqo, abahlanzekile nabaziphethe kahle okowomshayeli wonyaka, bese kuba nomklomelo womshayeli ongakaze enze izingozi, kube ngowophatha kahle abagibeli bese kuba nomklomelo wo-rank manager abawenza kahle umsebenzi,” kusho uNksz Mkhize.
Umphathi wohlelo kuzobe kuwumsakazi woKhozi FM uSiya Mhlongo. Kuzonandisa uGa Ndlela ocula umculo wokholo, Sambulo Nkwanyana, Mpama ehlangene nabaculi bendawo.
UNksz Mkhize uphinde waveza ukuthi abashayeli bazobhucwabhucwa umzimba ukuze ingqondo ihlale iqaqekile.
“Abashayeli bamatekisi bahlala usuku lonke beshayela, usoseshini waseMpumalanga ubone kubalulekile ukuthi babhucwabhucwe umzimba ukuze bahlale benomdlandla.” kusho uNksz Mkhize.
Uthe inhloso yemikhuleko wukukhumbuza abashayeli ngokubaluleka kokulandela imithetho yomgwaqo nokugqugquzela ubudlelwano obuhle phakathi kosomatekisi nomphakathi abasebenza kuwona.