Kuhlehlisiwe ukuqoshwa kwekaShaka

KUPHOQE ukuthi kume ukushuthwa kwefilimu ekhuluma ngempilo yeSilo uShaka, ngemuva kokuthi abaqondisi bayo bengamthandi umlingisi obezolingisa indawo ephambili u-Andile Gumbi.

Lokhu kuvezwe nguMnuz Themba Ndaba ongomnikazi wale filimu othe, bathungatha umuntu ozongena esikhaleni sika-Andile.

“Ngabe sesiqalile ukuqopha le filimu. Kodwa sesikuhlehlisele inyanga ezayo ngenxa yokuvuleka kwalesi sikhala. Abaqondisi bathe bafuna umuntu omusha onobuso obungaziwa ekulingiseni.”

Uthe kusasa bazobe beseThekwini, eSiwela Sonke Dance Studiyo, ngasePlayhouse bethungatha insizwa enebala elizothile ende engalungela ukungena kulesi sikhala. “Sifuna isidlakela eside esimnyama. Ngo-Agasti 3 siyaqala ukushutha ngakho intsha yaseThekwini ezethembayo ayifike ngobuningi bayo.”

Uthe kukhona nezinye izindawo abazozama ukuzivala njengoba befuna nowesifazane osekhulile ozolingisa indawo kaMkabayi. “Asifuni umfana onebala elikhanyayo kule ndawo kaShaka. Nakule kaMkabayi sifuna owesifazane ozoshintsha ubuso kuthuke amadoda njengoba sizwa kuthiwa uMkabayi wayesukuma phambi kwawo akhulume izwi lakhe lizwakale.”

Injongo ngale filimu uthe, bekumele benze ubulungiswa njengoba lena eyaqoshwa kudala yayikhuluma okuphambene.

“Le filimu esiyaziyo akukho okutheni ngayo njengoba igqamisa ushintsho olwenziwa abamhlophe. Kule esizoyenza izoqala la Isilo uShaka ebekwa esihlalweni kuze kufike lapho ekhothama khona,” kuchaza uNdaba.

Uthe abafuna ukuzama inhlanhla bangafika ngo-8, ekuseni njengoba inhlolokhono iyoze iphele ntambama.