Kushone isihlabani somculo we-jazz
UFE olwembiza umndeni wesihlabani se-jazz, sakwa-K KwaMashu uMfanafuthi “Wake” Mahlobo (53) (osesithombeni) odlule ngokuzuma emhlabeni ngeSonto.
UMahlobo, obeseneminyaka ewu35 endimeni yomculo nebidume ngelikaWake kwabaningi, ishonele esibhedlela iKing Dinuzulu, eThekwini.
Umfowabo kamufi, uMnuz Vusumuzi Mahlobo, uthe basadidekile ngokushona komfowabo obambeke isikhashana.
“Uqale ukubambeka ngenyanga edlule futhi nakhona asifunanga ukutshela abantu abaningi ngoba sicabanga ukuthi kuzodlula. Siphatheke kabi singumndeni njengoba kusizume kakhulu ukushona kukaWake,” kusho uMahlobo. Uthe umfowabo ubebambeka abuye alulame. Kuthe ngoMgqibelo bamphuthumisa esibhedlela ekhala ngokungazizwa kahle emzimbeni. “Ngifike ngahlala naye kancane. NangeSonto sambona futhi kodwa samfica esefakwe ama-drip singazi ukuthi sekwenzenjani. Odokotela bebesitshela ukuthi kukhona okumxinile kakhulu. NgeSonto ebusuku sibe sesithola ucingo kuthiwa usedlulile emhlabeni.” Uthe okwamanje njengomndeni bebesahlele ukuthi afihlwe ngoMgqibelo inkonzo yesikhumbuzo ibe ngoLwesihlanu.
“Uma izinto zingashintshanga nakanjani siyamfihla kule mpelasonto,” kusho uMahlobo.
Uthe uWake ushiye izingane eziningi nengoduso yakhe.
UWake ubesanda kubuya phesheya kwezilwandle. NgoMashi wayenekhonsathi eLuthuli Museum, eGroutville.
Ngo-1982 uWake nabanye baqala iqembu eladuma ngokuthi yiStax, elavumbulula amakhono abaculi abafana noKhanyo Maphumulo, Eugene Mthethwa weTrompies, Sipho Mbhele noDeborah Fraser.
Ubeseke wahambela amazwe okukhona kuwo i-USA, New Zealand ne-Australia.