Uklinywe wabulawa kubuka umyeni okhubazekile
ZIWAKHALELE amadoda amabili atholwe nemoto kathisha, isidumbu sakhe esitholwe sesiqala ukonakala siboshwe ngentambo entanyeni emzini wakhe. Lesi sidumbu besilaliswe eduze komyeni wakhe ongakwazi ukukhuluma nokuhamba, ngesonto eledlule.
Okhulumela amaphoyiosa KwaZulu-Natal uLt Colonel Thulani Zwane uthe, izolo ekuseni kuboshwe abasolwa ababili abaneminyaka ephakathi kuka-22 no-30 mayelana nalesi sehlakalo.
“Abasolwa batholwe ngamaphoyisa endaweni yaseNyoni lapho bebecashe khona. Kulindeleke ukuthi bavele eNkantolo yeMantshi yaseHluhluwe maduze,” kusho uZwane.
UNkk Nomalungelo Mtungwa (53) waseMduku, eHluhluwe obefundisa eBambanani High ngaphambi kokuthi athathe umhlalaphansi eminyakeni emibili edlule, isidumbu sakhe kuthiwa sitholwe ngumakhelwane sivalelwe endlini nomyeni wakhe ophila nokukhubazeka okuthiwa kudalwa yisifo sohlangothi.
Kuthiwa ubehlala nomyeni nodadewabo uNksz Sinqobile Msibi naye okuvele ukuthi uphazamiseke ngokwengqondo.
UNksz Ntombi Sibiya ongumzala kamufi uthe ushaqekile ngesikhathi ethola ucingo obeluvela komakhelwane bakamufi bemazisa ngalesi sehlakalo.
“Omakhelwane basitshele ukuthi uSinqobile (udadewabo kamufi) uqale ukufika ngoMsombuluko odlule wabatshela ukuthi uyahamba yena ngoba udadewabo ulimele. Bathi abamnakanga ngoba bayamazi ukuthi uphazamisekile engqondweni.
“NgoLwesine ubuye washo into efanayo, okwenze omunye womakhelwane wanquma ukumphelezela aye naye ekhaya. Ngesikhathi engqongqoza akekho ophendulile kwaze kwaphoqa ukuthi avule isicabha angene,” kuchaza uNksz Sibiya.
Uthe umakhelwane uthuke woma ngesikhathi ezithela phezu kwesidumbu sikaNkk Mntungwa silaliswe phansi siklinywe ngentambo entanyeni, ubaba wekhaya elele engenakwenza lutho njengoba engakwazi ukukhuluma nokuhamba.
“Siyajabula ukuthi amaphoyisa akwazile ukusheshe abambe abasolwa.
“Bakhombise isihluku esiyisimanga. Uma bebefuna imoto neselula bebengaze bambulale pho?” kubalisa uNksz Sibiya.
Khonamanjalo amaphoyisa aseBhekithemba anxusa noma ngubani ongaba nolwazi ngokubulawa kwendoda engaziwa eneminyaka elinganiselwa kwengu-40, isidumbu sayo esitholakale ngeSonto silahlwe esigangeni endaweni yaseNgonyameni. Kuthiwa sitholwe sinenxeba lokudutshulwa ekhanda siboshwe nezandla.
Ongaba nolwazi olungasiza amaphoyisa kucelwa ukuthi athinte umphenyi wecala uWarrant Officer Gumede ku- 031 9099964 noma ku-082 6427 998.