Kufunwa ababili abazosiza ophenyweni lwaseMzimkhulu
KUNGAKAPHOLI maseko kudutshulwe amakhansela amathathu e-ANC eMzimkhulu, ithimba eliyisipesheli eliphenya ukubulawa kosopolitiki likhiphe izithombe zamadoda amabili okuthiwa azosiza odabeni lwaseMzimkhulu.
NgoLwesine olwedlule kudutshulwe owayenguNobhala Jikelele we-ANCYL uMnuz Sindiso Magaqa oseyikhansela eMzimkhulu nozakwabo ababili bephuma emhlanganweni.
UMagaqa nozakwabo basezibhedlela ezingadalulwanga balaliswe egumbini labalimele kanzima.
Selokhu kudutshulwe la makhansela abantu baseMzimkhulu bahlezi lubhojozi njengoba inganono ihlala iqhuma kule ndawo.
Ngo-Ephreli kudutshulwe uSomlomo kaMasipala waseMzimkhulu uMnuz Khaya Thobela, owadutshulelwa emzini wakhe. Washonela endaweni yesehlakalo, amaphoyisa abopha umsolwa emuva kwezinsuku ezimbili.
Umhlaziyi wepolitiki waseUKZN, uMnuz Lukhona Mnguni, uthe kusazoshuba njengoba kunokhetho lobuholi eHarry Gwala.
Uthe abazoqokwa kulolu khetho bazoya engqungqutheleni yokukhetha ubuholi be-ANC ezoba seGoli ngoDisemba.
Izolo uBrigadier Hangwani Mulaudzi uthe ithimba eliphenya ngezehlakalo zokubulawa kwabantu lidinga ukufuniswa amadoda amabili okukholakala ukuthi azolekelela ecaleni laseMzimkhulu.
“Sicela abanemininingwane ngabantu esibafunayo bathinte uWarrant Officer Bengile Jeza 071 251 7233 noma iCrime Stop ku-08600 1011.”
Uthe ithimba labo lisebenza ubusuku nemini ukuqeda ukubulala okuhlangene nepolitiki njengoba libophe uMnuz Bonginkosi Jacob Twala osolwa ngokubulala uMnuz Mbhekiseni Khumalo (57) owayeyikhansela le-ANC oPhongolo.
UMulaudzi uthe uTwala kulindeleke ukuthi avele enkantolo ngoJulayi 26.