‘Amakhansela akube ngabantu abafundile’
USOLWAZI Paulus Zulu wasenyuvesi yaKwaZuluNatal uthe ingaphela eyokubulawa kosopolitiki uma kungaba nombandela wokuthi ukuze ube yikhansela kumele ukwazi ukufunda, ukubhala nokubala.
UZulu uthe kudingeka kube nombandela wokuthi ozoba yikhansela kube ngumuntu oyile esikoleni.
UZulu, obefakaza kwikhomishini eholwa nguAdvocate Marumo Moerane, ephenya ngezehlakalo zokubulawa kosopolitiki, uthe uma kubhekwa abantu ababulawa kakhulu amakhansela uma uqhathanisa namalungu eziShayamthetho noma awePhalamende.
“Kulula ukuba yikhansela, kudingeka ucule kakhulu uthamele yonke imihlangano yeqembu. Ukuba kuba nesigatshana sokuthi kumele ube ngumuntu oncwadile kungehla ukubulawa kosopolitiki. Yize singeke sithi akube ngumuntu oneziqu zeMasters ukuze ube yikhansela kodwa kumele uqonde izinto ezithinta imali, ukwazi ukufunda nokubhala ukuze ube yikhansela,” kusho uZulu.
Uthe kokunye amaqembu athatha noma yimuphi umuntu amenze ikhansela noma kungathiwa uphuma ejele.
Uthe ziningi izikhala zamakhansela okwenza ukuthi abantu babone nabo bengangena.
“EThekwini kuphela angaphezulu kuka-150 amakhansela akhona cabanga ke ezweni lonke. Yingakho wonke umuntu elangazelela ukuba yikhansela ngoba inkulu nemali ayiholayo manje. Cishe athola ngaphezulu kuka-R15 000 ngenyanga,” kuqhuba uZulu.
UMoerane utshele uZulu ukuthi uMthethosisekelo uvumela noma ngubani ukuthi angaba yikhansela ngaphandle uma kungukuthi unerekhodi lokulahlwa amacala.
UZulu uthe uMthethosisekelo ungachibiyelwa ukuze kufakwe isigatshana sokuthi abazoba amakhansela akube ngabantu abafundile.
Uthe udlame lubhekiswe kubaholi abasezikhundleni akujwayelekile ukuthi kushone umuntu ongenaso isikhundla.
USihlalo wekomiti elibhekele ukufundisa ngezepolitiki kwi-ANC, uMnuz Nathi Mthethwa, watshela abezindaba engqungqutheleni yale nhlangano yemigomo eyayiseGoli ukuthi bazilalele izikhalo zomphakathi ngamakhansela namalungu jikelele yingakho beqale isikole esizowafundisa ngezepolitiki. Wathi isikole sizoqala ukusebenza kwiinternet ngoba abakabi naso isakhiwo.