‘Kudingeka inhlambuluko emaqenjini ombusazwe’
USIHLALO weNdlu yabaHoli boMdabu KwaZulu-Natal, inkosi Phathisizwe Chiliza, uthi kwakumele kube nenhlambuluko phakathi kwamaqembu ezombusazwe ngemuva kodlame olwalukhona ukuze kuphele insila yokubulalana kosopololitiki.
UChiliza, obefakaza kwikhomishini ephenya ngokubulawa kosopolitiki KwaZuluNatal eyajutshwa nguNdunankulu uMnuz Willies Mchunu, uthe kwakumele amaqembu ayiswe kwiMbube bese kuba yiyo esho izinto okwakumele zenziwe njengonoMthebe weSizwe.
“Kumele kube nenhlambuluko, kuvalwe iqunga njengoba kwaba nodlame olwadlula nenqwaba yabantu KwaZulu-Natal. Kwakumele amaqembu ayiswe eSilweni ayohlanjululwa ukuze iphele le mpethu yokubulalana,” kusho uChiliza.
Uthe nasemahostela isimo sesishube kanje sekugcwele izinkabi ngoba amakhosi awasavakasheli khona.
“Abaholi bomdabu kumele banikwe amandla nesithunzi esibafanele njengoba kungabantu abaphemba uxolo. Kuqala bekuba yihlazo ukuthi ungahlaza isizwe sakho ngokwenza izinto ezingalungile uma uhlala ehostela ngoba amakhosi ezizwe abeqoqa izinsizwa avakashele amahostela. Bekufike kushaywe ingoma kuculwe nesicathamiya kube mnandi ngoba abesuke eyobheka abantu ukuthi bahleli kanjani akhuze nodlame,” kusho uChiliza.
Uthe bakhathazekile bengabaholi bomdabu ngokubulawa kosopolitiki kangangokuthi baze bacela nomhlangano noNdunankulu uMnuz Willies Mchunu neKhabhinethi yakhe.
“UNdunankulu usuke wakhala ngokuthi uke wabambeka engaphilile, sesilinde usuku lokuthi sihlangane naye ngoba sikhathazekile ngokubulawa kwabaholi bezepolitiki kulesi sifundazwe,” kusho uChiliza.
Uthe unethemba lokuthi emasontweni ambalwa ezayo bazoluthola usuku lomhlangano noMchunu.
UMchunu wajuba ikhomishini eholwa ngummeli u-Adv Marumo Moerane ukuphenya ngokubulawa kosopolitiki kulesi sifundazwe.