I-IFP ifuna kukhangiswe izikhala
I-IFP eThekwini inxuse uMasipala weTheku ukuthi uqoke abantu abaneziqu ezifanele ukuphatha izikhundla zezikhulu ezisanda kushiya kulo mkhandlu.
UMnuz Mdu Nkosi we-IFP uthe kunesikhala sesikhulu sophiko lwezindlu esavuleka emuva kokudedelwa kombiko kaManase.
“Sifisa umasipala uqale ukukhangisa izikhala zomsebenzi ezivulekile emuva kokushiya kwezikhulu zamaphiko ahlukahlukene kusukela kwagesi, ezomthetho, ezokuhlaliswa kwabantu nakwezempilo. Ukungaqashwa kwabantu kuphazamisa izinhlelo zokuthumela izidingo kubantu. Ngesikhathi kusekhona iNhloko yoPhiko lwezokuHlaliswa kwabantu iTheku belakha izindlu ezingu-15 000 ngonyaka kodwa isihambile isibalo sezindlu ezakhiwayo sehla sama ku-5 000 ngonyaka,” kusho uNkosi.
Uthe kufanele kuqokwe abantu abaneziqu zemisebenzi eyenziwayo hhayi abangamaqabane e-ANC ukuze umasipala usebenze kahle.
Inhloko yoPhiko lwezokuXhumana kuMasipala weTheku uNksz Tozi Mthethwa ithe umasipala uzolandela imithetho yezokuqashwa kwabasebenzi.Uthe benza ucwaningo lwamakhono abasebenzi bomkhandlu njalo ngonyaka ukuqinisekisa ukuthi abasebenzi banamakhono omsebenzi abawuqashelwe. “Ukucwaninga ngamakhono abasebenzi kuyasiza nokuthi size nezinhlelo zokuqeqesha abasebenzi ezifanele. Umasipala uzozigcwalisa izikhala ezikhona ngokulandela imithetho yezokuqashwa kwabasebenzi. Kuzoqashwa abantu abaneziqu zomsebenzi abawufundele.”Ebuzwa ukuthi isikhulu sezokuNgcebeleka namaGugu uMnuz Thembinkosi Ngcobo simiselweni emsebenzini nokuthi sizoqondiswa nini ubugwegwe, uthe: “Umasipala awuxoxi izindaba zabasebenzi nezinye izinhlaka. Uma kukhona udaba oluthinta umsebenzi luxoxwa naye ngoba kusuke kulandelwa umthetho we-Labour Relations. Umasipala uqinisekisa bonke abantu baseThekwini ukuthi izindaba zabasebenzi zilandelwa ngomthetho.”UNksz Mthethwa uphethe ngokuthi izinhlelo zokuthumela izidingo kubantu zizoqhubeka njengokujwayelekile.