Kufufusa isiteleka kwabahlola igazi
KUFUFUSA isiteleka esikhungweni esihlola igazi kuleli iNational Health Laboratory Services (NHLS).
Inyunyana yabasebenzi bezempilo iNational, Education, Health And Allied Workers’ Union (Nehawu) ithembise ukungenela ukhukhulelangoqo wesiteleka kuzwelonke ngenxa yokungaboni ngaso linye kwayo nabaphathi balesi sikhungo ngokunyuswa kwamaholo.
UNobhala jikelele weNehawu kuzwelonke, uMnuz Zola Saphetha uthe sebeyihambisile kumqashi incwadi exwayisa ngokuthi bazoteleka.Abasebenzi bafuna ukunyuselwa amaholo ngo7.3% kodwa umqashi uthi angawanyusa ngo-3%.USaphetha uthe sekunesikhathi besitholile isitifiketi sokuya esitelekeni kodwa banquma ukuqhubeka nokuxoxisana nomqashi ngoba befuna ukuqhamuka nesisombululo esingeke siholele esitelekeni.
I-NHLS inezikhulu ezibambile ngoba kumiswe ezinye zezikhulu eziphenywa ngenkohlakalo.
USaphetha uthe balungiselela izifundazwe ukuthi zingenele isiteleka.
Ibamba lomphathi weNHLS, uMnuz Shabir Madhi likuqinisekisile ukuthi izingxoxo zamaholo zalo nyaka azizange zihambe kahle okuholele ekutheni iCCMA inike izinyunyana isitifiketi sokungenela isiteleka.
Okhulumela iDA kwezeMpilo kuzwelonke, uNksz Patricia Kopane, uthe sebebhalele uNgqongqoshe wezeMpilo kuzwelonke, uDkt Aaron Motsoaledi bemtshela ukuthi angenelele ngokushesha njengoba kufufusa isiteleka.
Okhulumela uMnyango wezeMpilo kuzwelonke, uMnuz Joe Maila, uthe abeNHLS basasezingxoxweni nezinyunyana. Uthe banethemba lokuthi bazoqhamuka nesixazululo esizogwema isiteleka.