Shenxa Zuma, abasakudingi abantu – Makhosi
ILUNGU lePhalamende elikhuluma lingahlonizi ngezinto ezingahambi kahle kwi-ANC, uDkt Makhosi Khoza, selinxuse uMengameli Jacob Zuma ukuthi ehle esikhundleni ngoba abasamdingi abantu baseNingizimu Afrika.
UDkt Khoza ubeyingxenye yabantu abebesengqungqutheleni ebizwa nge-Conference for the Future of South Africa, ebiseRhema Bible Church, eRandburg, eGoli izolo.
UDkt Khoza uthe uma kufika u-Agasti 8 eseshonile ucela uMengameli Zuma ashenxe esikhundleni ngoba abantu sebekhathele uyena.
“Mengameli wavotelwa ngabantu abangu-11 million hhayi abangu-1 million abangamalungu e-ANC. Sekuyisikhathi sokuthi wehle esikhundleni ngoba abantu baseNingizimu Afrika abasakudingi. Awuwulandeli umthethosisekelo angazi usuziphule kangaki izifungo zakho. Yehla manje esikhundleni uhlenge umnotho wethu, abantu bakithi nabesifazane,” kusho uDkt Khoza.
UDkt Khoza wasongelwa ngokufa ekuqaleni kwalo nyaka ngemuva kokuphumela obala ngokungenami ngobuholi be-ANC. UDkt Khoza akaqali ukutshela uZuma ukuthi makaphume esikhundleni ngenxa yezinqumo ezingaphusile azithathayo.
Engxoxweni ekhethekile neSolezwe, uDkt Khoza waveza ukuthi uyasatshiswa ngamalungu e-ANCYL akulesi sifundazwe futhi akasakwazi nokuya emzini wakhe uma eseThekwini.
Kuleli sonto ufake imiyalezo ayithunyelwa ngomunye umuntu imsabisa ngokuthi usalelwe yizinsuku ezingu-21 ephila. Le miyalezo ifakwe ekhasini lakhe lezokuxhumana.
UNgqongqoshe wamaphoyisa, uMnuz Fikile Mbalula, uthe bazisukumela izinsongo zokusatshiswa kukaDkt Khoza kodwa bekungakaboshwa muntu.