Ucele kuyekwe eyezinhlangothi kwi-ANC

UMENGAMELI Jacob Zuma unxuse amalungu e-ANC ukuba abumbane ayeke indaba yezinhlangothi ngoba zibulalala umbutho.

Ekhuluma ngesikhathi enza isifundo ngalowo onguMengameli wokuqala wentando yabantu kuleli, uDkt Nelson Mandela eMpangeni izolo, uZuma uthe izinhlangothi ziwenza ube buthaka umbutho.

Uthe lokhu kwenzeka kakhulu uma beya ezingqungqutheleni zokukhetha ubuholi.

“Labo abahluliwe baya ehlathini beyohlomela ababahlulile okwenza kungabikhona ukuthula,” kusho uZuma.

Uthe amanye amaqabane alwa ezingqungqutheleni kuze kube sengathi alwa nesitha.

UZuma uthe izinhlangothi zingaqedwa wuhlelo lokuthi uhlangothi olunqobile ezingqungqutheleni lungazithathi zonke izikhundla kodwa lucazelane nabahluliwe.

Uthe lolu daba kumele luxoxwe kabanzi, ngoba ngeke bakwazi ukuthula basonge izandla bebona inhlangano ifa.

“Kumele siwulaphe umbutho ngokwethu akekho omunye ongasisiza,” kusho uZuma.

Uthe lokho kungasiza kugweme ukuthi kuphume elinye iqembu kwi-ANC ngemuva kwengqungquthela kaDismeba.

“Engqungqutheleni ka-2007, kunabaholi abanohlonze abahamba kwiANC ngoba uhlangothi lwabo luhluliwe, lokho kwasilimaza njengombutho,” kusho uZuma.

Uthe kumele sibheke ukuthi yini edala ukuthi kube nokwehlukana.

“Akumele ukuthi silibalekile iqiniso elithi izinketho zangaphakathi kwiANC zidala ukuthi kushube isimo,” kusho uZuma.

Uthe ngisho noma ngabe kuthiwa lolu hlelo alusebenzi ngoDisemba kodwa kumele bagcine besithathile isinqumo balusebenzisa.

“Ngisho ngabe kuthiwa amanye amaqabane acabanga ukuthi siphazamisa izinhlelo zawo kodwa konke esikwenzayo kumele sicabangele umbutho,” kusho uZuma.

Uthe lesi siphakamiso senziwa ngo-2012, saphasiswa eMangaung kodwa kwakhona abasishaya indiva.

“Kumele sibe nephepha kulolu hlelo ukuze lusebenze,” kusho uZuma.

Unxuse osopolitiki ukuba baqonde ipolitki ukuze bangathengeki kalula.

Uthe ukuba yena ubengayazi ipilitiki ngabe kade ashiya ngendlela ahlaselwa ngayo nxazonke.

“Kunabantu abathatha imikhonto bagwaze abafowabo, uma uqonda ipolitiki ungashiyelana kanjani inkundla nalowo owayenguMengameli wakuleli wengcindezelo uMnuz FW de Klerk, kumele nazi ukuthi labo abenza lokho ipolitiki yabo ingangabazisa, ungakwazi kanjani ukushiyelana inkundla noMnuz Mmusi Maimane ukhulume kabi ngenhlangano yakho,” kusho uZuma.

Lapha uZuma ubehlasela uMnuz Thabo Mbeki noMnuz Kgalema Monthlante kodwa egudla iguma.

Uthe kunabantu abagibele eziteji basho yonke into bangabaphenduli, wengeza ngokuthi kodwa siyofika isikhathi bambuleke izinqe abenza lokho.

UZuma uphinde wahlasela i-SACP wathi imosha isikhathi esiningi igxeka i-ANC ize ikhohle umsebenzi wayo.

“AmaKhomanisi ahlangane izinsuku kodwa akukho aphume nakho kokushintsha impilo yabantu ngoba alibala wuKhonglose,” kusho uZuma.