Asishiyele izingane zethu izwe elingcono
MHLELI:Izwe esiphila kulo liyingozi. Ubungozi balo abudalwa nje abantu abenza okubi kepha ukuthula nokungenzi lutho kwalabo abathathwa njengabenza okuhle. Lokhu kusho nqgo isimo esibhekene naso eNingizimu Afrika njengamanje.
Izwe lethu ligcwele ubugebengu. Liyanuka phu yinkohlakalo. Abantu esiphila nabo banezifo ezehlukahlukene. Wonke umuntu ulindele kube woseceleni kwakhe osukumayo. Yiloyo naloyo uyazihlangula, uthi akudokwe ligayelwe mina leli. Labo abambalwa abanesibindi sokuzama ukwenza okanye ukusho okuthile bephikisana nobubi kuba yibo ababi. Isibonelo nje nguDokotela Makhosi Khoza (osesithombeni) osenyamanambana eqenjini elibusayo i-ANC.
Lokhu kungenxa yokuphumela kwakhe obala aphikisane nenkohlakalo kanye nobunye ububi beqembu elibusayo. Kuyamangaza ukuqaphela ukuthi umphakathi usukumukele okubi. Sesize safika ezingeni lapho inkohlakalo kuyinto engasethusi kepha kunalokho sesexwaya labo abazama ukulungisa isimo.
Ukuze siphume enkingeni esikuyo njengezwe sidinga ubuholi obuqotho. Ubuholi obuzokwazi ukumela iqiniso noma ngabe bambalwa kangakanani abakholelwa kulo. Abantu abazoba nesibindi sokuma basho izinto abaningi abasabayo ukuzizwa. Siphelile isikhathi sabaholi abakhuluma lokho okuthandwa yiningi. Uma ngikhuluma ngobuholi angikhulumi nje ngabantu abanezikhundla. Eqinisweni akusona isikhundla esikwenza umholi kepha kodwa yizenzo zakho. Ngikhuluma ngabantu abanombono nokulubalubela ukubona iNingizimu Afrika egcono kunale esiphila kuyo.
Sidinga ukuthatha ukwehlukana kwethu ngokwepolitiki sikubeke eceleni, ukwehlukana ngokwenkolo sikubeke ethala sibumbane silwe nesihlava esidla izwe lethu elihle kangaka. Kudinga sishiyele izingane nezizukulwane zethu izwe elingcono kunalokho eliyikho manje. Asingavumeli ukuba umlando usahlulele kabi njengabantu elafa ngesikhathi sabo izwe. Sihle Siyabonga Ngidi AVOCA HILLS